Ulttyq neırohırýrgııa ortalyǵynyń dárigerleri bir jarym jastaǵy balaǵa kúrdeli operasııa jasap, mıyndaǵy isikti alyp tastady. Bul operasııa MÁMS júıesi aıasynda júzege asty.
Naýqastyń anasynyń aıtýynsha, bala bir jasqa deıin qatarlastarynan qalmaı, tolyqqandy ósip kele jatqan. Biraq arada kóp ýaqyt ótpeı aýrýdyń alǵashqy belgileri baıqala bastaıdy. Anasy ulynyń sebepsiz jylap, mazasyzdanatynyn, kóz uıashyǵy qozǵalysynyń buzylýyn, mezgil-mezgil qusatynyn, sol qoly men aıaǵynyń álsizdigin baıqaıdy.
Sodan anasy №2 qalalyq balalar aýrýhanasyna qaralýǵa barady. Onda balany neırohırýrgter qarap, MRT zertteý júrgizgen. MRT nátıjeleri boıynsha balada oń jartyshardyń samaı-mańdaı-tóbe bólikterinde jáne oń jaq qarynshanyń proeksııasynda ornalasqan 7 sm úlken mı isigi anyqtalady.
Jedel emdeý úshin bala Ulttyq neırohırýrgııa ortalyǵyna jiberildi. Balalar neırohırýrgııasy bólimshesiniń meńgerýshisi Ǵabıt О́leńbaıdyń aıtýynsha, isiktiń kólemi óte úlken (6,5h6, 8h7,1 sm), bala mıynyń jartysyna jýyǵyn alyp jatyr jáne mıdyń fýnksıonaldy mańyzdy aımaqtarynda ornalasqan. Sondyqtan operasııa óte kúrdeli ótipti. Sonymen qatar aýyr asqynýlarǵa ákelýi múmkin operasııalyq qan joǵaltý qaýpi joǵary bolǵan.
«Biz mıdyń jartysharyndaǵy samaı-mańdaı-tóbe bólikterinde kólemdi túzilgen isikti mıkrohırýrgııalyq jolmen alyp tastadyq. Operasııa kezinde barlyq zamanaýı ádis qoldanyldy. Sondaı-aq qyzmetkerlerdiń joǵary biliktiligi men ortalyqtyń operasııalyq bloginiń joǵary deńgeıde jabdyqtalýy da operasııanyń sátti ótýine yqpal etti. Qazirgi ýaqytta bala operasııadan keıingi emnen ótip, anasymen birge palataǵa shyǵaryldy», dedi Ǵ.О́leńbaı.
Osy oraıda anestezıologterdiń joǵary kásibıligin atap ótý kerek. Mundaı kishkentaı jastaǵy balaǵa operasııa jasaýda anestezııa berýdiń qıyndyqtary barshylyq. Qan, tynys alýdy muqııat baqylaý, anestezııany óte yjdaǵatty esepteý, jalpy balanyń ómiri úshin úlken jaýapkershilik neırohırýrgterdiń, anestezıologterdiń, transfýzıologterdiń, orta jáne kishi medısınalyq qyzmetkerlerdiń moınynda boldy.
Operasııany professor, UǴA akademıgi Serik Aqsholaqov, joǵary bilikti neırohırýrg-dáriger, balalar neırohırýrgııasy bólimshesiniń meńgerýshisi, «UNO» AQ professory Ǵabıt О́leńbaı, neırohırýrg dáriger Saparbek Seıitbekov jasady. Sondaı-aq operasııa barysynda anestezıolog-reanımatolog dáriger Jumadýlla Shadıev, meıirger anestezıolog Janar Arynova, transfýzıolog dáriger Erbol Qýanyshev jáne operasııa meıirgeri Araılym Chamkarovalar boldy.