Qazan aıynyń bel ortasynda AQSh-tyń Tehas shtatyndaǵy Rozenberg qalasynda germanııalyq Vınchenso Gýalterıdi altynshy raýndta uryp jyǵyp, orta salmaqta WBO men IBF sekildi eki birdeı beldi nusqanyń chempıondyq belbeýin ıelengen Jánibek Álimhanuly «Top Rank Boxing» promoýterlik kompanııasynyń basshylaryna aldaǵy ýaqytta Erıslandı Lara nemese Karlos Adamestiń birimen jekpe-jek uıymdastyrý jaıynda ótinish bildirdi. Al sol boksshylar jaıynda biz ne bilemiz?
«Gýantanamonyń altyny» degen janama esimge ıe bolǵan Erıslandı Laranyń jasy – 40-ta. Kezinde ol áýesqoı rıngte tabysty óner kórsetti. 2005 jyly Qytaıdyń Mınıan qalasynda ótken álem chempıonatynda 69 kg salmaq dárejesinde synǵa túsken kýbalyq boksshy ýkraınalyq Sergeı Derevıanchenko (30:9), úndistandyq Vıjender Sıngh (aıqyn jeńis), reseılik Andreı Balanov (28:16), amerıkalyq Melson Boıd (aıqyn jeńis), qazaq Baqtııar Artaev (31:22) jáne belarýstik Magomed Nýrýtdınovty (24:9) utyp, bas júldeni oljalady. Dál sol jyly Lara Máskeýde uıymdastyrylǵan Álem kýboginde kúmis medaldy ıelense, 2006 jyly Kolýmbııanyń Kartahenasynda Ortalyq Amerıka men Karıb basseıini oıyndarynyń jeńimpazy atandy. Sóz oraıy kelgende, Erıslandı Laranyń túrli jarystarda bizdiń Baqyt Sársekbaevqa eki márte ese jibergenin de aıta ketken abzal.
2007 jyly Brazılııada alaýy tutanǵan Panamerıka oıyndary barysynda Lara óziniń komandalyq áriptesi, Olımpıada men álemniń eki dúrkin chempıony Gılermo Rıgondo ekeýi qashýǵa áreket jasaıdy. Biraq bul jospar júzege aspaı, jergilikti polıseıler olardy Kýbanyń delegasııa basshylaryna tabystaıdy. Desek te kelesi jyly Lara kózdegen maqsatyna qol jetkizdi. Basynda Germanııaǵa qonystanǵan ol kóp uzamaı AQSh-qa attandy.
Kýbanyń qabylany kásipqoı rıngtegi tusaýkeser kezdesýin 2008 jyldyń 4 shildesinde ótkizdi. Sodan beri 15 jyldan asa ýaqyt zýlap óte shyqqan eken. Sol aralyqta Erıslandı 34 ret sharshy alańǵa shyǵyp, 28 jekpe-jekti óz paıdasyna sheshti. 16 qarsylasyn esinen tandyrdy. Ol 2011 jyly Pol Ýılıams (39-2), 2014 jyly Saýl Alvares (43-1-1) jáne 2018 jyly Djarrett Herdtan (21-0) upaı sanymen utyldy. Taǵy úsh báseke teń aıaqtaldy. Sońǵy ret Lara byltyr kóktemde Gerı O’Sallıvandy segizinshi raýndta sulatyp salyp, WBA nusqasynyń orta salmaqtaǵy chempıondyq ataǵyn sátti qorǵady.
Al Karlos Adames – 29 jasta. Domınıkan Respýblıkasynda dúnıege kelgen ol da sporttyq mansabyn áýesqoı rıngten bastady. Jastardyń Panamerıka birinshiliginde top jaryp, álemdik dodada shırek fınalǵa deıin jetti. Erler arasynda qurlyq chempıonatynyń qola júldegeri atandy. 2013 jyly Almatydaǵy Balýan Sholaq atyndaǵy sport saraıynda jalaýy jelbiregen dúnıejúzilik dodada úsh kezdesý ótkizdi. Alǵashqy eki qarsylasyn utqanymen, 1/8 fınalda bizdiń Mereı Aqshalovqa jol berdi.
Adames kásipqoılar arasynda 2015 jyldan beri óner kórsetip keledi. Sol aralyqta 24 kezdesý ótkizip, 23 ret jeńiske jetti. 18 básekede aıqyn basymdyq tanytty. Onyń tek Patrık Teısheıraǵa áli jetpedi. 2019 jyldyń 30 qarashasynda ótken kezdesýde barlyq tóreshi brazılııalyqtyń myqtylyǵyn moıyndady. Karlos keıingi úsh jekpe-jeginde Sergeı Derevıanchenko, Hýan Masıas Montel jáne Djýlıan Ýılıams syndy tanymal bylǵary qolǵap sheberlerin jeńdi. Qazirgi kezde domınıkandyq boksshynyń WBC nusqasy boıynsha jartylaı orta salmaqtyń «ýaqytsha» chempıony degen ataǵy bar.