Soltústik Qazaqstan oblystyq prokýratýrasynyń málimdeýinshe, Ǵ.Músirepov aýdanynda bıýdjet qarajatyn qoldy qylý deregi anyqtalǵan. Bul zańsyzdyqty prokýratýra qyzmetkerleri 2022 jylǵy málimetterdi tekserý barysynda áshkerelep otyr.
Aýdannyń turǵyn-úı kommýnaldyq bóliminiń basshysy «Memlekettik satyp alý týraly» zańǵa sáıkes tenderdi utyp alǵan merdiger kompanııa oryndaýǵa tıisti avtomobıl joldarynyń jóndelmegenine qaramastan atqarylmaǵan jumys aktisine qol qoıyp, 427 mln teńge tólegen.
Osynshama qomaqty qarjyny zańsyz tólegen adamnyń esimi áli kúnge atalmaı otyr. Sonymen birge qarjyny túk istemeı qaltasyna basqan merdiger kompanııa basshysynyń da aty-jóni belgisiz. Jóndeý jumystaryn baqylaýǵa memleket tarapynan taǵaıyndalǵan tehnıkalyq qadaǵalaý sarapshysynyń da esimi beımálim. Joldyń jóndelgenin qadaǵalaýǵa taǵaıyndalǵan sarapshy da «jol jóndeldi» degen ótirik aktige qol qoıǵan. Osy isti qaraǵan Petropavl qalalyq soty Qylmystyq kodekstiń 189-babynyń 4-tarmaǵy 2-tarmaqshasymen qarastyrylǵan qylmystyq quqyq buzýshylyq jasaǵany úshin iske tikeleı qatysty úsheýiniń árqaısysyna 7 jyl merzimge bas bostandyǵynan aıyrý túrindegi jaza taǵaıyndady.
Biraq jolǵa qatysty mundaı oqıǵalar óńirde áli de kóp ekenin turǵyndar jaqsy biledi. О́ıtkeni bıyl ǵana jóndelgen joldar kelesi jyly shurq-tesik bolyp jatady. Bul da jóndeý jumystarynyń jáne qoldanylǵan materıaldardyń óte sapasyz, tek kózboıaýshylyq úshin ǵana jasalǵanyn kórsetedi.
Prokýratýra organdary mundaı olqylyqtardy Petropavl qalasynyń jóndeldi degen joldarynan taýyp otyr. Oblys prokýratýrasynyń resmı saıtynda: «Avtomobıl joldary týraly» zań talaptaryn buza otyryp, Petropavl qalasynyń turǵyn úı-kommýnaldyq sharýashylyq bóliminiń laýazymdy adamdary qalanyń 20 kóshesin aǵymdaǵy jáne ortasha jóndeý úshin oryndalǵan jumystar aktilerine qol qoıǵan, olar is júzinde Qazaqstan Respýblıkasy Ulttyq standartynyń belgilengen normalaryna sáıkes kelmeıdi», dep jazylǵan.
Merdiger joldardy shala jóndep, sertıfıkatqa saı kelmeıtin asfalt-beton qospasyn paıdalanǵan. Al baqylaý men qadaǵalaýǵa tıisti sheneýnikter sapasyz jasalǵan joldardy tolyq jóndelgen degen aktige qol qoıǵan. Osyndaı olqylyqtar oblys ortalyǵynyń jóndeldi degen 20 kóshesiniń joldarynan tabylǵan. Árıne, bul jerde de «barmaq basty, kóz qystylyq» bar ekeni kórinip tur. Áıtpese, qarajaıaý adamdar emes, TKSh-nyń mamandary joldyń qalaı jóndelgenin bilýge tıis. Bıyl ǵana jóndelgen joldardyń shurq-tesik bolyp jatqanyn turǵyndar kúnde kóredi.
Prokýratýra organdary tekserip, tıisti akt jasaǵannan keıin buzýshylyqtardy joıý jáne jumysty qabyldaý aktisine qol qoıǵan laýazymdy adamdardy jaýapkershilikke tartý jóninde sharalar júrgizilip jatyr.
PETROPAVL