Bıken Rımova atyndaǵy Taldyqorǵan drama teatry Ashǵabad qalasynda ótetin «Baqyt dáýirindegi teatr óneri» festıvaline qatysady. Jetisýlyqtar – rýhanı dodaǵa el ishinde joldama alǵan tuńǵysh óner ujymy.
Qarasha aıynyń ortasynda ótetin óner báıgesin Túrikmenstannyń Mádenıet mınıstrligi men TÚRKSOI Halyqaralyq uıymy birlesip uıymdastyryp otyr. Ondaǵy maqsat ulttyq teatr ónerin damytý jáne teatrlardyń shyǵarmashylyq bastamalaryn yntalandyrý ekenin alǵa tartýda. Sondaı-aq túrki halyqtarynyń basyn bir shańyraq astyna qosyp, mádenıet úndestigin nasıhattaý. Nege deseńiz, teatr ártisteri ózara shyǵarmashylyq baılanysta bolyp, el men jerdiń mádenı ómirine boılaýy mańyzdy. Osylaısha, álemdik sahnaǵa jol ashylmaq.
Atalǵan festıvaldyń basty talaptarynyń biri qatysýshy teatrlardan usynylǵan qoıylym klassıkalyq nemese ulttyq shyǵarmadan bolýǵa tıis. О́ńirlik teatr qazaq ádebıetiniń klassıgi, uly jazýshy Muhtar Áýezovtiń «Qorǵansyzdyń kúni» shyǵarmasynyń jelisimen sahnalanǵan qoıylymdy usynyp, qazaq eliniń namysyn qorǵaıdy. Spektakldiń qoıýshy-rejısseri – Farhad Moldaǵalı.
«Qorǵansyzdyń kúni» shyǵarmasy Bıken Rımova atyndaǵy Taldyqorǵan drama teatrynyń repertýaryndaǵy shoqtyǵy bıik qoıylymdardyń biri. Spektaklde avtor baıyrǵy qazaq aýylyndaǵy kedeıler ómiriniń bir kórinisin tamyr-tereńinen qoparyp ákelip, qorǵansyz jandardyń turmys-tirshiligindegi jan túrshigerlik azap pen aýyrtpalyqty asa shynshyldyqpen áserli baıandaıdy.
Halyqaralyq festıvalǵa Tatarstan, Qyrǵyzstan, О́zbekstan, Tájikstan, Túrikmenstan memleketterinen teatr ujymdary qatysady. Aıta ketý kerek, Bıken Rımova atyndaǵy Taldyqorǵan drama teatry – elimizden alǵash ret qatysatyn oblystyq teatr.
Jetisý oblysy