Búginde temir tehnıkalardyń áleýeti adamnan kem emes. Bárine qabiletti. Al ulttyq sport túrlerinen baq synasqan robottar tipten erekshe. KazRoboSport-2023 robottehnıkasy boıynsha respýblıkalyq sporttyq chempıonatynda robottar asyq atyp, arqan tartyp, aqsúıek oınap synǵa tústi. Sondaı-aq japondyq sýmodan da tartysty óner kórsetti.
Chempıonatqa qatysqandardyń qarasy kóp. Fınalǵa elimizdiń 20 óńirinen kelgen 214 qatysýshy áýeli 4 myńnan astam adamnyń arasynan iriktelip alynǵan. Osyǵan qarap-aq, elimizde robottehnıka salasyna qyzyǵýshylyqtyń joǵary ekenin baıqaýǵa bolady. Al osy sporttyq robottehnıka chempıonaty 2016 jyldan beri ótkizilip keledi.
Elimizdiń túkpir-túkpirinde kóktemnen bastap irikteý kezeńderi ótip, 5 qarashada Astana qalasynda oblystar men megapolısterdiń komandalary basyn qosqan fınal boldy. Chempıonatqa aýyl balalary, aýla komandalary, jeke robottehnıka mektepteri, mamandandyrylǵan lıseıler men kolledjder qatysty. Baıqaýda ulttyq sport túrleri men oıyndarynan jarysqan robottardy ázirleýshiler basqaryp otyrdy.
«Bizdiń uıym qoǵamdyq qaǵıdalarǵa negizdelgen jáne qyzmetimiz úshin qarjylyq ótemaqy almaımyz. Bizdiń jumysymyzdyń negizgi maqsaty – ǵylymı-tehnıkalyq shyǵarmashylyqty keńinen nasıhattaý jáne balalar men jastar arasynda ınjenerlik mamandyqtardyń bedelin arttyrý. Sonymen qatar biz ınjenerııa salasyndaǵy ózekti máselelerdi sheshýde jáne zamanaýı tehnologııamen jumys jasaýda alǵan bilimimizdi tájirıbede qoldanýǵa múmkindik beremiz. Biz ınformatıka muǵalimderiniń biliktiligin arttyrýmen de aınalysamyz, sebebi robottehnıkany oqytýda basty jaýapkershilik sol kisilerge júktelgen. Aıta keterligi, bizdiń barlyq is-sharalarymyz demeýshilerdiń qoldaýynyń arqasynda ótip jatyr», dedi «QazRobotıks» otandyq bilim berý jáne sporttyq robottehnıka federasııasynyń prezıdenti Aıjan Jekeeva.
Uıymdastyrýshylardyń aıtýynsha, barlyq tapsyrmany NatRoboCom robosportynyń ulttyq túrlerin damytý qozǵalysy men «QazRobotıks» federasııasy músheleri ázirlegen. Tehnıkalyq reglamentter jyldamdyq pen dáldik boıynsha konkýrstyq formatta oryndaý úshin oqý robottarynyń úlgilerin qurý jáne baǵdarlamalaý daǵdylaryn anyqtaýdy eskere otyryp ázirlengen.
«Chempıonat ınnovasııalar men ozyq tehnologııalarǵa qyzyǵýshylyqty arttyrýǵa, sondaı-aq daryndy jastardy anyqtap, qoldaýǵa septigin tıgizedi. Bul jarys álemdik standarttarǵa jáne olımpıadalar men chempıonattardyń erejelerine sáıkes ótkiziletin sporttyq jarystarǵa uqsaıdy, biraq qatysýshylar – adamdar basqaratyn robottar. Mundaı baıqaýlar elimizdi joǵary bilikti ǵylymı-tehnıkalyq kadrlardyń jańa legimen qamtamasyz etýge kómektesetinine senimdimiz», dedi Astana Hub bilim berý baǵdarlamalary keńsesiniń dırektory Dáýlet Beımýrzınov.
Chempıonat aıasynda robottehnıkany damytý máselelerine arnalǵan dóńgelek ústel uıymdastyrylyp, sarapshylar sóz sóılep, federasııanyń aımaqtyq ókilderi óz tájirıbelerin bólisti. Jeńimpazdar Astana IT Unversity alańynda saltanatty túrde marapattaldy.
Aıta keteıik, KazRoboSport-2023 sporttyq robottehnıkasy boıynsha respýblıkalyq chempıonattyń uıymdastyrýshysy – «QazRobotıks» Qazaqstan bilim berý jáne sporttyq robottehnıka federasııasy. Al baıqaýǵa Astana Hub halyqaralyq tehnoparki demeýshilik etti.