Panama qalasynda robototehnıkadan dúnıejúzilik «World Robot Olympiad» olımpıadasy ótti. Oǵan 80-nen astam eldiń 10-19 jas aralyǵyndaǵy 6-11 synyp oqýshylary qatysty. Bul saıysta Qazaqstan oqýshylary oq boıy ozyq shyǵyp, jeńis tuǵyrynan kórindi, dep habarlaıdy Egemen.kz.
Olımpıada robottardy jobalaý, baǵdarlamalaý, ınjenerlik ǵylymdar jáne basqa da ınnovasııalyq bilim berý tehnologııalary salasynda daryndy oqýshylardy anyqtaý jáne qoldaý maqsatynda uıymdastyrylady.
Robototehnıka boıynsha dúnıejúzilik olımpıadanyń qorytyndysy boıynsha Qazaqstannyń úsh komandasy júldeger atandy:
2-oryn (kúmis) «Future Engineers» kategorııasynda astanalyq 10-synyp oqýshylary Ańsar Saýrbaev jáne Amır Qarabaev;
3-oryn (qola) «Robo Mission» kategorııasynda Astana qalasynyń 8-9 synyp oqýshylary Vagız Dısembaev pen Janarys Kaparov;
3-oryn (qola) «Future Engineers» kategorııasynda Qyzylorda qalasynyń 11-synyp oqýshylary Maksım Ýsolsev pen Dinmuhamed Ábdıev.
Aıta ketsek, dúnıejúzilik robototehnıka olımpıadasy eń alǵash 2004 jyly Sıngapýrda 1-shi robottar saıys-festıvali retinde ótken eken. Atalǵan olımpıadaǵa Qazaqstan 2014 jyldan beri qatysyp keledi.