Táýelsizdik jyldary qıyndyǵy men qýanyshy qatar órilgen Jańatas qalasynyń bir qaýym jurty taıaýda jańa páterdiń kiltine alyp, máre-sáre kúı keshti. Aýdan ortalyǵynda eki bólmeli – 44, úsh bólmeli – 8, tórt bólmeli 4 páteri bar turǵyn úı paıdalanýǵa berildi.
Jańatas qalasyndaǵy 1-yqsham aýdanda ornalasqan №60 úıge qonystanǵan jergilikti halyqty óńir basshysy Erbol Qarashókeev arnaıy quttyqtaı baryp, turǵyndardyń qýanyshyna ortaqtasty. Is-shara barysynda sóz alǵan oblys ákimi óńir halqyn baspanamen qamtamasyz etý baǵytynda atqarylyp jatqan jumystar jaıynda sóz qozǵady.
«Memlekettiń basym baǵyttarynyń biri – baspana máselesin sheshý.
Halyqty turǵyn úımen qamtý saıasaty Memleket basshysy Qasym-Jomart Toqaevtyń nazarynda turǵany barshamyzǵa málim. Sondyqtan bul baǵytta qolǵa alynǵan jumystyń mańyzy zor. Halyqty baspanamen qamtý óńirdiń ekonomıkalyq jaǵdaıyn jaqsartýǵa jáne halyqtyń turmystyq máselesin sheshýge septigin tıgizeri anyq. Biz páter kezeginde turǵan oblys turǵyndarynyń sanyn azaıtý maqsatynda jyl saıyn turǵyn úı qurylysynyń kólemin ulǵaıtyp otyrmyz. Máselen, ótken jyly paıdalanýǵa berilgen turǵyn úıdiń jalpy kólemi 693,5 myń sharshy metrdi qurap, 2021 jylmen salystyrǵanda 1,5 paıyzǵa artty. Al bıyl oblys boıynsha 698,7 myń sharshy metr turǵyn úı berýdi kózdep otyrmyz. 2022 jyly 28 turǵyn úı paıdalanýǵa berilse, osy jyly 41 turǵyn úı paıdalanýǵa berilmek. Sonymen qatar respýblıkalyq bıýdjetten 7,6 mlrd teńgege turǵyn úı kezeginde turǵan áleýmettik osal toptar men kópbalaly otbasylar sanatyna 797 páter satyp alý josparlanǵan», deıdi E.Qarashókeev.
О́ńir basshysy keltirgen derekke sensek, aýdan ortalyǵynda 1 638 azamat páter kezeginde tur. Olardyń máselesin sheshý boıynsha jergilikti atqarýshy bılikke naqty tapsyrma júktelgen. Osy jyldyń ózinde Jańatas qalasynda jańǵyrtýdan ótken 160 páterli úsh úıdi satyp alyp, jergilikti jurttyń ıgiligine berý kózdelip otyr.
Jambyl oblysy,
Sarysý aýdany