24 jeltoqsanda Máskeýde aralas jekpe-jekten ASA promoýsheniniń muryndyq bolýymen jeńil salmaqta Gran-prı týrnıriniń shırek fınaldyq saıystary ótedi.
Reseı astanasynda 31 jastaǵy Artem Reznıkov te (24-11) óner kórsetedi. Shyǵys Qazaqstan oblysy Rıdder qalasynyń týmasy byltyrǵy maýsymda dál osy jarystyń fınalyna deıin jetken edi. Alaıda sheshýshi tusta reseılik Edýard Vartanıanǵa ese jiberdi. Endi ol bıyl qalaı da sol olqylyqtyń ornyn toltyrý úshin baryn salady. Artem atalǵan týrnırdegi alǵashqy jekpe-jegin Álı Bagovqa qarsy ótkizedi. 32 jastaǵy Kabardıno-Balkarııa týmasy 42 ret oktagonǵa shyǵyp, 31 ret jeńis toıyn toılady. 25 básekede aıqyn basymdyq tanytty.
– Barlyǵy da «Reznıkovtiń grepplıngi keremet» dep aıtady. Biraq áste olaı emes. Jeltoqsanda ótetin jekpe-jekte men Artemǵa naǵyz grepplıng qandaı ekenin kórsetemin. Únemi shabýyldap, qarsylasyma bir sátke de damyldaýǵa múmkindik bermeımin, – deıdi Á.Bagov.