Oral qalasyndaǵy Nazarbaev zııatkerlik mektebiniń 8-synyp oqýshylary – Jomart Kárim, Álim Ospanov jáne Jáńgir Jarmuhambetov mektep muǵalimine kómekshi bolatyn robottyń jobasyn jasap shyqty.
«Biz jasaǵan «Muǵalimniń kómekshi roboty» ustazdyń biraz qyzmetin ózi atqarady. Mysaly, oqýshylardyń test jaýaptaryn, bilim deńgeıin avtomatty túrde jasandy ıntellekti arqyly tekserip beredi. Sabaq kestesin retteıdi. Sonymen qosa toqsan sońynda beriletin tapsyrmalardy elektrondy túrde jasaıdy jáne tekseristen ótkizedi. Robottyń óziniń arnaıy kamerasy bar. Sol arqyly qaı oqýshynyń sharshap otyrǵanyn, qaı oqýshynyń uıqysy kelip otyrǵanyn birden «biledi». Budan ózge de qyzyqty fýnksııalary bar», deıdi jas ónertapqyshtar.
Dál osy joba jaqynda Qaraǵandyda ótken «ROBOLAND-2023» VIII halyqaralyq robottehnıka jáne ınnovasııalyq jobalar baıqaýynda júldeli III oryndy jeńip alǵan. Oqýshy shyǵarmashylyǵyn damytyp, robottehnıka salasyna qyzyǵýshylyǵyn arttyrý jáne ınjenerlik qabiletin shyńdaý maqsatynda ótken bul saıysqa Qyrǵyzstan, О́zbekstan, Reseı, Grekııa memleketterinen jáne elimizdiń ár óńirinen jas ónertapqyshtar qatysqan bolatyn.
«Bul baıqaýdyń aýqymy keń boldy, myńǵa jýyq oqýshy óz jobasyn tanystyrdy. Bizdiń sanat boıynsha 20 komanda synǵa túsip edi. Oqýshylar úmitti aqtady, 3-oryndy ıelendi», deıdi mekteptegi robottehnıka úıirmesiniń jetekshisi Nurbol Qyryqbaev.
Aıta keteıik, Oral qalasy Nazarbaev zııatkerlik mektebinde «Robottehnıka» úıirmesi jemisti jumys istep keledi. Mektep qorjynynda bul baǵyt boıynsha kóptegen halyqaralyq, respýblıkalyq deńgeıdegi júlde bar.
Batys Qazaqstan oblysy