Progerııa aýrýyna shaldyqqan Qazaqstandaǵy jalǵyz adam Nurjan О́rkeshbaev emdelýge nıeti bolsa da, eshqandaı jeńildikter joqtyǵyna nalıdy, dep habarlaıdy Egemen.kz.
Massaget.kz tilshisiniń málimetinshe, naýqas emdelýge aqsha tappaı júr.
"Jaǵdaıymdy kimge baryp, aıta bereıin? Meıli oblystyń dárigerleri bolsyn, shendileri bolsyn, eshqaısysy densaýlyq jaǵdaıymdy surap jatqan joq. Emdelý úshin, ota jasatý úshin, qomaqty aqsha kerek. Azyn aýlaq malǵa qarap otyrǵan men sııaqty adamǵa bul az qarajat emes", - deıdi Nurjan.
Búginde Nurjan mal baǵýdan bólek, toılarda án aıtyp, nápaqa taýyp júrgenin aıtty.
"О́zim turaqty jumys isteıtin asabam bar. Demalys kúnderi tapsyrys kóp túsedi. Atyraýdyń basy, keıde Aqtaýǵa baryp júrmin. Múgedektikke baılanysty alyp otyrǵan járdemaqym toqtap qaldy. Atyraýdaǵy quzyrly organ "jumysqa jaramdysyń" deıdi. Aýdan "jaramsyzsyń" deıdi. Dárigerlerge qaralaıyn desem, "med saqtandyrýyń joq" deıdi. Sonymen, járdemaqy jaǵyn qaıta rásimdeý máselesi túsiniksiz kúıinde qalyp otyr" - deıdi Nurjan.
Osydan biraz jyl buryn shańyraq kótergen Nurjan jubaıymen dám-tuzy jaraspaı, eki jaqqa ketkenin aıtty.
"Qazir boıdaqpyn. Biraq, áli de bolsa úmitim bar", - deıdi Nurjan.
Búgingi tańda Nurjan Atyraý oblysyna qarasty ózi týyp-ósken Muqyr aýylynda turyp jatyr.
Eske sala ketsek, Nurjan О́rkeshbaev týraly 2000-jyldary alǵash aıtyla bastady. Ol kezde Nurjan nebári 10 jasta bolatyn. Nurjan týraly BAQ keńinen jaza bastaǵannan keıin erte qartaıǵan bala Reseı, Germanııa elderiniń birqatar klınıkasyna barǵan. Biraq áıgili klınıkalar Nurjannyń DNQ saraptamalaryn teksergennen basqa em kórsete almady. Keıin Japonııanyń professorlary Nurjanǵa zertteý júrgizdi.