Shalǵaıdaǵy shaǵyn aýyldardy joǵary jyldamdyqty ınternet júıesimen qamtamasyz etý aıryqsha mańyzdy. Taıaýda elimizde tuńǵysh ret aýyl mektebi Starlink kompanııasynyń jobasy arqasynda osyndaı qamqorlyqqa ıe boldy.
Shaǵyn aýyl úshin aq túıeniń qarny jarylǵan qýanyshty oqıǵa boldy. Balalarynyń bolashaǵyna alańdap, zaman talabyna saı bilim alýynyń jaı-kúıine eleńdep otyrǵan ata-analardyń kóńili kónshigendeı. Orta mektep oqýshylary bilim platformalaryna, elimizdiń jáne álemniń úzdik pedagogteriniń sabaqtaryna erkin qol jetkizetin bolady. Endigi arada aldarynan bolashaqtyń sara joly ashylǵaly tur.
«Mekteptiń ınnovasııalyq oqý úderisterin jan-jaqty qamtýǵa múmkindik týyp otyr, – deıdi aýyl mektebiniń dırektory Júsip Mahmetov, – oqý úderisinde sıfrlyq bilim berý resýrstaryn kedergisiz paıdalana alamyz».
Kompanııa aldaǵy ýaqytta aýyl mektepteriniń ahýalyn jaqsartyp, múmkindik keńistigin qala mektepteriniń kókjıegimen teńestirmek. Buryn arman bolyp kelgen bul másele aqıqatqa aınalatyndaı.
«Biz ınternet jyldamdyǵyn sekýndyna 20 mbıt-ten artyq qamtamasyz etýdiń tehnıkalyq múmkindigi joq mektepterdiń tizimin pysyqtap, kelisip aldyq. Olardyń barlyǵy Starlink jobasyna engizilgen. Mundaı múmkindikke qol jetkizý mektep muǵalimderi men oqýshylaryna bir mezgilde «Kúndelik» júıesinde, «Bilim land» bilim berý platformasynda, «NOBD» ınternet resýrsynda jumys isteýge mol múmkindik beredi. Bul jetistik aldymen qala men aýyl mektepteriniń arasyndaǵy alshaqtyqty qysqartyp, aýyl muǵalimderiniń túrli onlaın jarııalanymdarǵa qatysýyna jol ashady», deıdi Aqmola óńirlik bilim berýdegi jańa tehnologııalar ortalyǵynyń dırektory Baǵdat Qadyrov.
Sóz arasynda 2024 jyly osy joba aıasynda oblystyń 32 myńnan astam oqýshysy oqıtyn 270 mektep joǵary jyldamdyqty ınternet jelisimen qamtamasyz etiletinin aıta ketýimiz kerek. Osyndaı shynaıy qamqorlyq jasalyp jatsa, aýyl turǵyndarynyń balalarynyń bolashaǵyn oılap údere kóshýine de bir toqtam bolar edi.
Aqmola oblysy,
Qorǵaljyn aýdany