Májilis spıkeri Erlan Qoshanovtyń tóraǵalyǵymen Bıýro otyrysy ótip, aldaǵy jalpy otyrystyń kún tártibi naqtylandy.
Depýtattardyń talqylaýyna turǵyn úı saıasatyn reformalaý máseleleri boıynsha zań jobasyn birinshi oqylymda qaraý usynylady.
Bul zań jobasynda Memleket basshysynyń tapsyrmasy boıynsha «Otbasy banki» tolyqqandy damý ınstıtýtyn qurý maqsatymen azamattardy esepke qoıýdy jáne turǵyn úılerdi bólýdi ortalyqtandyrýǵa baǵyttalǵan normalar engizilgen. Sonymen qatar memlekettik mindetterdi, áskerı qyzmetti atqarý jáne quqyqtyq tártipti qorǵaý kezinde, adam ómirin qutqarý kezinde qaza tapqan adamdardyń otbasylaryn bir jyldan keshiktirmeı turǵyn úımen qamtamasyz etý týraly jáne taǵy basqa da birqatar mańyzdy norma qarastyrylyp otyr.
Jalpy otyrysta depýtattar ratıfıkasııalanatyn zań jobalaryn qaraıdy. Olar: Ujymdyq qaýipsizdik týraly shart uıymynyń Jarǵysyna ózgerister engizý týraly tórtinshi hattama, Eýrazııalyq ekonomıkalyq odaq týraly shartqa ózgerister engizý týraly hattama.
Májilis komıteti azamattyq qorǵaý máseleleri boıynsha ózgerister men tolyqtyrýlar engizý týraly zań jobasyn jumysqa alady.