Senbiden jeksenbige qaraǵan túni Pavlodar oblysynda jyldamdyǵy sekýndyna 37 metrge deıin jetetin surapyl daýyl turyp, jergilikti ınfraqurylymdar men elektr baǵandaryna, kommýnaldyq jáne turǵyn úı ǵımarattaryna zaqym keldi. Tótenshe jaǵdaıdan Ekibastuzdaǵy jylý-energııa ortalyǵynyń qazandyqtary da isten shyqty. Keshe oblystaǵy 3 qala men 6 aýdan tótenshe jaǵdaı rejimin jarııalady.
Mamandardyń aıtýynsha, mundaı surapyl daýyl sońǵy 20 jylda tirkelmegen. «Qazgıdromet» RMK-nyń jergilikti fılıaly qatty jeldiń bolatyny týraly aldyn ala eskertken. Aıtsa aıtqandaı, ekpindeı soqqan jel eldi mekenderdegi aǵashtardy túbirimen qulatyp, úıler men ǵımarattardyń shatyrlary, tóbe jabyndaryn ushyryp áketti. Tótenshe jaǵdaı departamentiniń baspasóz qyzmeti habarlaǵandaı, bul túni 100-den asa eldi mekende elektr qýaty úzilgen.
Pavlodar oblysy ákiminiń birinshi orynbasary Serik Batyrǵojınov atap ótkendeı, jeldiń saldarynan óńirde 83 áleýmettik nysanǵa nuqsan kelgen. Onyń 61-i – bilim berý uıymy. 63 kópqabatty úıdiń tóbe jabyndary men shatyrlary, endi biriniń qabyrǵa japsyrmalary zaqymdanǵan.
– Daýyl soqqan túni oblystyń elektr júıesinde 246 avarııalyq ajyratý oryn aldy. Jalpy sany 70 myńnan asa jeke úı, 6 myńnan asa zańdy tulǵalar qýat kózinen ajyratyldy. Qalpyna keltirý jumystary shuǵyl júrgizilip, basym bóliginde jaǵdaı retteldi. Qazirgi ýaqytta 4 aýdandaǵy 28 aýyl áli de jaryqsyz otyr. Surapyl jel úlken elektr baǵandaryn qulatqan. Tipti Baıanaýyl aýdany ortalyǵynda 50 jyl myzǵymaı turǵan stellany sulatyp túsirgen. 3 qala men 6 aýdan búgin tabıǵı
sıpattaǵy tótenshe jaǵdaı rejimin jarııalady. Ol bir táýlik ishinde kúshine enip, erteńnen bastap ǵımarattardy qalpyna keltirý jumystary bastalady. Al múliktik zardap shekken azamattardyń shyǵyny arnaıy qaǵıda boıynsha jergilikti atqarýshy bıliktiń qarastyrýymen 30 táýilik ishinde ótelýi kerek. Aıtyp óteıik, Ertis, Jelezın, Aqtoǵaı, Tereńkól aýdandarynyń ınfraqurylymy tabıǵattyń bul tosyn qubylysynan aman qaldy, – dedi ol.
Bul túni Pavlodar qalasyna qarasty aýyldardyń energııalyq júıesi kóp zardap shekti. Elektr júıesinde aqaý shyqqandyqtan oblys ortalyǵyndaǵy kóptegen turǵyn úıde jylý biraz ýaqyt joǵalyp ketti. Jylýmen qamtý mekemesiniń aqparyna sensek, qorek kózinen úzilgen jylý sorǵylary biraz ýaqytqa toqtap qalǵan. Buǵan qosa kóshelerdegi jarnamalyq konstrýksııalar, baǵdarshamdar, ondaǵan avtobýs aıaldamalary jeldiń ekpinimen qırady. Úı aýlalary men kóshelerde qulaǵan aǵashtardyń saldarynan ondaǵan jeńil kólik zaqymdanǵan.
Al Ekibastuz qalasynda bul túni ekpindeı soqqan jel jylý berý júıesin toqtatyp tastady. Ekibastuz JEO-daǵy elektr qýatymen qamtý júıesine zaqym kelip, ortalyqtaǵy negizgi jáne rezervtik shaǵyn stansalar isten shyqqan. JEO-daǵy negizgi jabdyqtar elektr energııasy esebinen jumys isteıtindikten mundaǵy jylý qazandyqtary da toqtaǵan. Tek tańǵy saǵat bester shamasynda ǵana stansadaǵy aqaýlyqtar joıylyp, qazandyqtar tańerteń iske qosyldy. Sońǵy eki kúnde kómirli shahardyń jylý júıesindegi parametrler rettelip, jylýmen qamtý qaıta turaqtandy.
Aıtyp óteıik, óńirdegi daýyldyń saldaryn joıýǵa qatysty qazirgi ýaqytta tótenshe jaǵdaı shtaby qurylyp, jedel jeli jumys isteýde. Azamattyq qorǵaý qyzmetiniń kúshteri men quraldaryn paıdalana otyryp, jóndeý-qalpyna keltirý jumystary jalǵasyp jatyr.
Pavlodar oblysy