Bokstan Qazaqstan quramasynyń alǵashqy nómirleri belgili boldy. Olar Olımpıada oıyndaryna talasady, dep habarlaıdy Egemen.kz.
Buǵan deıin Qamshybek Qońqabaev (92 kelige deıin) pen Karına Ibragımova (57 kelige deıin) 2024 jylǵy oıyndarǵa kvota aldy. Al Qazaqstan quramasy Astanada ótken spartakıadanyń qorytyndysyn shyǵarǵan bolatyn.
«Munda Qazaqstannyń eń úzdik boksshylary óner kórsetti. Biz tek ekeýin ǵana oıynnan shyǵardyq. Qalǵan jigitter de kóńildi qaldyrmady. Jas boksshylardyń óskeni baıqaldy, eshkim úlken ataqtardan qoryqpady, jekpe-jek tartysty ótti.
Jartylaı fınaldyq jáne fınaldyq jekpe-jekterdiń kóbi tartysty ótti. Úmit artylǵandar óz tarazylarynda óz dárejesin dáleldedi.
Spartakıada qorytyndysy Qazaqstanda bokstyń baryn, básekelestiktiń baryn, keleshegi kemel ekenin kórsetti. Jas boksshylardy qarap shyqtyq, olardy tárbıelep, bolashaqta kóshbasshy etip daıyndaıtyn bolamyz», dedi Qazaqstan erler quramasynyń bas bapkeri Myrzaǵalı Aıtjanov.
Tórt jylda bir ret ótetin jarysta 13 salmaq dárejesi boıynsha 176 sportshy júldeli oryndardy sarapqa saldy. Ulttyq quramanyń kapıtany Aslanbek Shymbergenov týrnırden bosatyldy.
Chempıondar Temirtas Júsipov (48 kelige deıin), Sáken Bıbosynov (51 kelige deıin), Nursultan Altynbek (54 kelige deıin), Mahmud Sabyrhan (57 kelige deıin), Beıbarys Jeksen (60 kelige deıin), Muhammedsabyr Bazarbaıuly (63 kelige deıin) boldy.
Sondaı-aq Dýlat Bekbaýov (67 kelige deıin), Talǵat Shaıken (71 kelige deıin), Dıas Moljigitov (75 kelige deıin), Nurbek Oralbaı (80 kelige deıin), Temirlan Muqataev (86 kelige deıin), Aıbek Oralbaı (92 kelige deıin) jáne Damır Toıbaı (92 keliden joǵary) altynnan alqa taqty.
Aldyn ala málimet boıynsha, 2024 jylǵy Olımpıadada boks týrnıri 13 salmaq dárejesinde ótedi: erler 7 salmaq dárejesinde, al áıelder taǵy 6 salmaq dárejesinde óner kórsetedi.