HVQ mıssııasy basshysymen kezdesti

Kezdesý barysynda Úkimet Halyq­aralyq valıýta qorymen seriktes­tikke úlken mán beretini jáne onyń Qazaqstan ekonomıkasyn damytýǵa qosqan úlesin joǵary baǵalaıtyny atalyp ótildi.

Bıyl Halyqaralyq valıýta qory­nyń basqarýshy dırektory Krıs­talına Georgıevanyń Qazaq­stan­ǵa sapary jáne Almatyda Kavkaz, Ortalyq Azııa elderi jáne Mońǵo­lııa úshin áleýetti damytý jónin­­degi óńirlik ortalyqtyń ashylýy sııaqty mańyzdy oqıǵalar baǵany belgili.

Álıhan Smaıylov atap ótkendeı, búginde el ekonomıkasy jańa jaǵdaı­ǵa beıimdelip, turaqty ósim kór­setti. Atap aıtqanda, 10 aıdyń qory­tyndysy boıynsha IJО́ ósimi 4,9%-dy qurady. Negizgi kapıtalǵa salynǵan ınvestısııalar 12,6%-ǵa ósti. Bul – aldaǵy 2024 jylǵy oń dınamıka úshin qajetti shart. Sonymen qatar Úkimet pen Ulttyq banktiń birlesken shara­laryn júzege asyrý nátıjesinde ınflıa­sııanyń aıtarlyqtaı baıaýlaýy baıqalady.

Úkimet basshysy halyqaralyq reıtıngtik agenttikterdiń Qazaqstan­nyń táýelsiz nesıelik reıtıngin ınves­tısııalyq deńgeıde rastaǵanyn aıtty. Sondaı-aq qazan aıynda «Moody's» agenttigi reıtıng boıynsha bol­jamyn «turaqtydan» «oń kórsetkishke» deıin jaqsartty.

Premer-mınıstrdiń sózin­she, qazir­gi ýaqytta Qazaqstanda salyq-bıýdjet saıasatyn jetildirý jumystary júrgizilip jatyr. Bıýd­jettik úderisterdi ońtaı­lan­dyrýǵa, bıýd­jetaralyq qatynas­tardy jaq­sar­týǵa jáne jalpy memle­kettik qarjyny basqarý sapasyn art­tyrýǵa baǵyttalǵan jańa Bıýdjet kodeksi ázirlený ústinde. Budan bólek, jańa Salyq kodeksi ázirlenip jatyr.

«Bizdiń basty mindetimiz – makro­ekonomıkalyq turaqtylyqty jáne tu­raqty ekonomıkalyq ósýdi ári qaraı qam­tamasyz etý. Osy turǵyda Halyq­aralyq valıýta qoryna turaq­ty qol­daý kórsetkeni úshin rızashy­lyǵymyz­dy bildiremiz», dedi Álıhan Smaıylov.

Nıkolıa Blanshe Qazaq­stannyń bolashaqta aýqymdy ekono­­mıkalyq ósýge qol jetkizýi úshin qýaty men múmkindikteri jetki­likti ekenin atap ótti.

«Biz respýblıkanyń qarqyndy ósý jolyndaǵy ambısııasyn kórip otyrmyz jáne qol jetkizgen jetistikterin eskeremiz. Alǵa jyljý kóptegen salada baıqalady. Bul ósimge qandaı jolmen qol jetkiziletini óte mańyzdy. Biz keńesterimiz ben usynystarymyzda dál osy joldardy kórsetemiz. Bizdiń oıymyzsha, jeke sektor memlekettiń qoldaýymen jetekshi ról atqarýy kerek»,   dedi HVQ-nyń Qazaqstandaǵy mıssııasynyń basshysy.

Kezdesý qorytyndysy boıynsha taraptar Qazaqstannyń qarjy sektoryn odan ári jetildirý jáne damytý úshin ózara is-qımyldy jalǵastyrýǵa daıyn ekenderin rastady.