Qostanaı oblysyna jumys saparymen kelgen Eńbek jáne halyqty áleýmettik qorǵaý mınıstri Svetlana Jaqypova Rýdnyı qalasyna baryp, birneshe kásiporyndy aralady. Odan keıin óńirdiń óndiristik kásiporyndarynyń jumysshylarymen kezdesti. «Gornıak» mádenıet úıinde ótken jıynǵa «Sarybaı-Sokolov» ken baıytý birlestigi, «Krasnooktıabrsk boksıt keni basqarmasy», «Qostanaı mıneraldary», «Agromashholdıng», «Varvarınskoe», «О́rken» «SaryarqaAvtoProm», «Komarov taý-ken kásiporny» sekildi iri óndiris oryndarynyń jumysshylary men kásipodaq uıymdarynyń ókilderi qatysty.
Kezdesý barysynda óndiristegi eńbek qaýipsizdigi men áleýmettik qorǵaý máseleleri talqylandy. Sondaı-aq uzaq jyl boıy zııandy eńbek jaǵdaıynda jumys istep júrgen azamattarǵa jańa áleýmettik tólem engizýdiń joldary týraly sóz boldy. Mınıstrdiń aıtýynsha, 2024 jyldyń 1 qańtarynan bastap zııandy jumys oryndarynda eńbek etip júrgen azamattarǵa 55 jastan zeınet jasyna tolǵanǵa deıin arnaıy áleýmettik tólem engiziletin bolady.
«Prezıdenttiń tikeleı tapsyrmasymen mınıstrlik birneshe zańǵa túzetý engizý týraly joba ázirledi. Bul túzetýler zııandy eńbek jaǵdaıynda jumys isteıtin adamdardy áleýmettik qorǵaý deńgeıin arttyrý maqsatynda engiziledi. Atalǵan zań jobasy Parlament Májilisiniń jalpy otyrysynda maquldanyp, Senat qaraýyna jiberildi. Atalǵan áleýmettik tólem tórt qarajat kózinen júrgiziledi. Respýblıkalyq bıýdjetten eki eń tómen kúnkóris deńgeıi mólsherinde – 86 814 teńge tólenedi. Jumys berýshi 43 407 teńge tóleıdi. Oǵan qosa ómirdi saqtandyrý qory men mindetti zeınet jarnalary esebinen 43 407 teńgeden tólenedi. Jalpy, tólemniń kólemi 200 myń teńgeden asady. Tólem zeınetkerlik jasqa deıin tólenedi», dedi Svetlana Jaqypova.
«Kezdesýge qatysýshylar jańa áleýmettik tólem kimderge, qandaı jaǵdaıda taǵaıyndalady? Bul basqa áleýmettik tólemderge áser etpeı me? Jumys berýshilerdiń jarnasy zeınetaqy qoryna ne ózgeris ákeledi?» degen sııaqty suraqtar qoıdy. Ár saýalǵa jan-jaqty, tııanaqty jaýap berildi. Kezdesýden keıin mınıstr jeke basyndaǵy máseleler boıynsha jolyqqysy kelgen birneshe azamatty qabyldady.
Qostanaı oblysy