Sóılegen sózinde apattyq úılerde turyp jatqan adamdardyń ómiri saǵat saıyn, mınýt saıyn qaýipti jaǵdaıda ekenin eske salǵan depýtat Edil Jańbyrshın 3 myń 402 adamnyń sondaı úılerde turyp jatqanyn aıtty, dep jazady Egemen.kz.
Apattyq úıler máselesin eki depýtat kótergenin, mınıstr jalpy Úkimet atalǵan máseleni sheshý jóninde eshqandaı tııanaqty mehanızdi aıta almaǵanyn tilge tıek etken depýtat E.Jańbyrshın kezinde Aqtaý qalasynda apatty jaǵdaıda bolǵan 15 úı máselesi memleket pen jeke kásipker seriktestigi arqyly sheshilgenin aıtty.
«Infraqurylymdy kúsheıtip berdik, qalǵanyn bıznes jasady. Solaısha bıýdjettiń aqshasyn únemdedik. Kásipker sanıtarlyq normasy joǵary úıdi saldy, josparlady, kóshirdi. 4 jyldyń ishinde Aqtaýdaǵy 15 apatty úıdi joq qyldyq», dedi depýtat.
Depýtattyń aıtýynsha bıznesti tartýǵa múmkindik bar. О́ıtkeni, apatty úılerdiń barlyǵy jaqsy jerlerde ornalasqan, mysaly qalanyń ortasynda, t.b.
Qurylysshylar bar ekenin, bankter nesıeler beretinin, bıznesti tartý kerek ekenin aıtqan depýtat: «Memleket pen jeke kásipkerlerdiń seriktestigi arqyly apatty úı máselesin sheshýge bolady. Osyndaı mehanızmderdi mınıstrlik kásipkerlermen birge iske asyrý kerek», dep sózin túıindedi.