Balalardyń qalyptasýynda qorshaǵan ortasynyń áseri aıryqsha. Ásirese mekteptegi kezeń oqýshyǵa qyzyq ta kúrdeli. Dál osy shaqta balalar psıhologııalyq turǵydan kedergilerge ushyraıdy. Oqýshy keminde 5-6 saǵatyn mektepte ótkizetindikten, mekemeniń balalardyń ómirine beıjaı qaramaýy, psıhologııalyq kómek kórsetýdi júıeleýi qajet-aq.
Kóp mektepte psıholog mamannyń jumysy júıelenbegen. Bilim berý mekemelerinde maman bolǵanymen, ol barlyq oqýshymen tyǵyz jumys isteýge múmkindigi joq. О́ıtkeni bir psıholog búkil balanyń jaı-kúıin jeke-jeke qadaǵalaı almaıdy. Degenmen birneshe jyldan beri Oqý-aǵartý mınıstrligi bilim berý uıymdarynda psıhologııalyq qoldaýdy ınstıtýttandyrý boıynsha keshendi jumys júrgizip keledi. Mysaly, bir ǵana mamanǵa 500 oqýshynyń jaýapkershiligin artýǵa bolmaıtynyn eskerip, osy júktemeni azaıtý máselesi qarastyrylyp jatyr.
Sonymen qatar psıhologııalyq qoldaý qyzmetin kúsheıtý maqsatynda Oqý-aǵartý mınıstrligi bıyl tamyz aıynda balalardy zorlyq-zombylyqtan qorǵaý, sýısıdtiń aldyn alý jáne olardyń quqyqtary men salamattylyǵyn qamtamasyz etýdiń 2023-2025 jyldarǵa arnalǵan keshendi josparyn, sondaı-aq pedagog-psıhologter men áleýmettik pedagogterdi daıarlaýǵa qoıylatyn talaptardy qamtıtyn «Pedagog» kásiptik standartyn qabyldaǵan bolatyn.
«Mamandardyń neǵurlym tıimdi jumys isteýi úshin bilim berý uıymdarynda psıhologııalyq qyzmet erejeleri qabyldandy. Mindetti qujattardyń tizbesi qysqartyldy. 8 óńirde psıhologııalyq qoldaý ortalyqtary qurylyp, «Sıfrlyq kabınetti» ashý josparlanǵan. Pedagog-psıhologterdiń jumys ýaqyty bekitilip, oqytý kýrstary uıymdastyryldy. Máselen, bıyl 4,5 myńǵa jýyq pedagog-psıholog biliktilikti arttyrý kýrstarynan ótti. Atalǵan qadamdar balalar arasyndaǵy keleńsiz qubylystardyń úlesin azaıtyp qana qoımaı, pozıtıvti oılaýdy qalyptastyrýǵa múmkindik bermek», deıdi Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Mınıstrliktiń málimetinshe, bilim berý baǵdarlamalaryn jańartý jáne bilim berý uıymdarynda mamandar sanyn arttyrý jumystary júrgizilip jatyr. Budan bólek elimizdiń barlyq óńirinde psıhologııalyq qyzmet ortalyqtaryn ashý josparlanǵan. Búginde elimizde 8 myńnan astam pedagog-psıholog jumys isteıdi.
«Balalardyń qaýipsizdigin qamtamasyz etý, olardyń mentaldy densaýlyǵy men damýyn qorǵaý, sýısıdterdi boldyrmaý jáne kámeletke tolmaǵandar arasynda býllıngtiń aldyn alý maqsatynda dáıekti qadamdardy júzege asyrýǵa ortaq kúsh-jigerdi biriktirý qajet. Búginde barlyq memlekettik organdy, úkimettik emes sektordy, steıkholderlerdi, sondaı-aq ata-analar men balalardyń ózderin tarta otyryp, ómirlik qıyn jaǵdaıǵa tap bolǵan otbasylardy ýaqtyly anyqtaý júıesin damytý mańyzdy», deıdi Oqý-aǵartý mınıstri Ǵanı Beısembaev.
Keıingi kezderi jasóspirimder arasyndaǵy janjal jıilep ketkeni baıqalady. Balalardyń boıyndaǵy qatygezdigi, ózimshildigi, ortadan bólektenýi – qoǵam derti. Sondyqtan olarǵa der kezinde tıisti kómek kórsetý qajet. Osy oraıda Oqý-aǵartý vıse-mınıstri Edil Ospan óńirlerde kámeletke tolmaǵandar arasynda quqyq buzýshylyqtyń aldyn alý jumystary da qarqyndy júrip jatqanyn atap ótken edi.
«Buǵan deıin Balalardyń quqyqtaryn qorǵaý komıteti mektep ishinde esepke alýdy júrgizýdiń ádistemelik usynymdaryn ázirlep, bekitken bolatyn. Olar mektepterge basa nazar aýdarýdy jáne kómek kórsetýdi qajet etetin balalardy anyqtaý maqsatynda usynylady. Munda esepte turǵan árbir balaǵa qosymsha sabaq uıymdastyrý, balanyń shyǵarmashylyq, sporttyq áleýetin ashý, áleýmettik jáne psıhologııalyq-pedagogıkalyq qoldaý kómegi qarastyrylǵan», dedi Edil Ospan.