Qasym-Jomart Toqaev 2060 jylǵa qaraı Qazaqstan kómirtegi beıtaraptyǵyna qol jetkizýdi maqsat etip otyrǵanyn málimdedi. Bul týraly Prezıdent BUU-nyń Ortalyq Azııa ekonomıkalaryna arnalǵan Arnaıy baǵdarlamasynda (SPEKA) aıtty, dep habarlaıdy Egemen.kz.
Osy rette Prezıdent SPEKA memleketteriniń basshylaryn balamaly energııa kózderine kóshý máselesinde birlesken is-áreketti jandandyrýǵa jáne Almatyda Ortalyq Azııa elderiniń klımat máseleleri jónindegi jobalyq keńsesin qurý bastamasyn qoldaýǵa shaqyrdy.
«Sıfrlyq tehnologııa jáne jasandy ıntellekt salasyndaǵy yqpaldastyq keń múmkindikterge jol ashady. Jasandy ıntellektiniń dáıekti damýy óndiristi, eńbek naryǵyn jáne qyzmet kórsetý salasyn transformasııalaý úshin bizge asa mańyzdy mindet júktep otyr. Elimizdegi memlekettik qyzmetterdiń 90 paıyzdan astamy elektrondy túrde kórsetiledi, al qolma-qol aqshasyz tranzaksııalardyń úlesi 80 paıyzdan asty. Tek ótken jyldyń ózinde IT salasyndaǵy eksport kólemi bes ese artty. Biz bul kórsetkishti 2026 jylǵa qaraı bir mıllıard dollarǵa deıin jetkizýdi kózdep otyrmyz», dedi Memleket basshysy.