Úkimette Premer-mınıstr Álıhan Smaıylovtyń tóraǵalyǵymen ótken keńeste Almaty jáne Qonaev qalalarynyń arasynda Alataý shaharynyń (G4 City) qurylysy jobasyn iske asyrý máseleleri talqylandy.
Jıynda ortalyq memlekettik organdardyń jáne óńir ákimdigi basshylarynyń qatysýymen qalany damytý tásilderi qaraldy. Josparǵa sáıkes bul otandyq jáne sheteldik ınvestısııalardy tarta otyryp, jahandyq standarttar boıynsha jumys isteıtin Halyqaralyq bıznes-habqa aınalýǵa tıis. Bul rette Dýbaı, Sıngapýr, Tıanszın, t.b. sııaqty álemniń áıgili ortalyqtaryn qurý tájirıbesi negizge alynbaq.
Atap aıtqanda, Almaty oblysyndaǵy Alataý qalasyn damytý Qytaımen, Ortalyq Azııa elderimen saýda jáne ınvestısııalyq ózara is-qımyl deńgeıin arttyrýǵa, birqatar jańa óndiristik jáne kommersııalyq jobany iske qosýǵa, túrli salada ozyq tájirıbeni engizýge múmkindik beredi. Osy maqsatta ınvestısııalar tartý jáne kásipkerlik qyzmetti júrgizý úshin qolaıly jaǵdaılar jasalyp, yntalandyrý sharalary kózdeledi. Bul sonyń ishinde salyq jáne kedendik artyqshylyqtarǵa da qatysty.
Sonymen qatar Alataý qalasynyń aýmaǵynda erekshe quqyqtyq rejimdi, onyń ishinde AHQO quqyǵyn engizý múmkindigi qaralady. Premer-mınıstr bul jumystardy iske asyrý kezinde halyqaralyq tájirıbeni eskerip, tıimdiligi joǵary sharalardy qoldaný qajettigin atap ótti. Buǵan qosa bıznespen ózara is-qımyl kezinde, atap aıtqanda, memlekettik-jekemenshik áriptestigi tetigi arqyly qajetti ınfraqurylym qurylysyn jandandyrý qajettigi aıtyldy.