Taý-tasy men dalasynda san ǵasyrlyq tarıhtyń syry tunǵan Almaty oblysynda 1683 jyly bolǵan áıgili Qaradala shaıqasynyń tarıhı qoıylymy kórsetildi. Is-shara Aqtaban shubyryndy, alqakól sulama qasiretiniń 300 jyldyǵyn eske alýǵa oraı uıymdastyryldy.
«Qaradalada – qalyń iz,
Qaradalada – janymyz.
Qaradalada kıeli –
tógilgen kindik qanymyz», – dep belgili qoǵam qaıratkeri, aqyn Nurlan Orazalın oı tolǵaǵan qasıetti Qaradala tósinde ótken, rýhty eldiń erligin pash etken qoıylymnyń ashylý saltanatyna oblys ákiminiń birinshi orynbasary Nurlan Ábdirahym, Almaty oblysynyń Qurmetti azamaty Yzǵarbek Bektursynov, Uıǵyr aýdanynyń ákimi Bota Eleýsizova qatysyp, izgi tilekterin bildirdi.
«Bul qoıylym – tarıhı sanany oıatýǵa sony serpin berdi. Myń ólip, myń tirilgen halqymyzdyń ata qonysyn naızanyń ushy, bilektiń kúshimen qorǵaǵan erligin pash etti. О́skeleń urpaqtyń el men jer tarıhyn tanýyna tikeleı yqpal etken spektakldi sahnalaǵan ártisterge alǵysymyz sheksiz», – deıdi qoǵam qaıratrkeri Yzǵarbek Bektursynov.
Qasıetti Qaradalanyń ortalyq stadıonynda ótken bul tarıhı qoıylymdy tamashalaýǵa alys-jaqynnan eki myńnan astam kórermen jıylyp, qas-dushpanǵa qarsy shapqan bahadúr babalardyń el men jerin qorǵaýdaǵy batyrlyǵy men tabandylyǵyna tánti boldy, tarıhı oqıǵalarǵa qanyqty.
«Almaty oblysynyń ishki saıasat basqarmasy» MM, «Qoǵamdyq kelisim jáne damý ortalyǵy» KMM-si muryndyq bolǵan bul is-shara – «Uly dalanyń uly tulǵalary» jobasynyń úshinshi kezeńi sanalady. Birinshi kezeńde uly dalanyń mádenı-tarıhı qundylyqtaryn, ejelgi dáýirdegi arheologııalyq eskertkishterdi zerdeleý maqsatynda arnaıy tarıhı ekspedısııa uıymdastyrylsa, ekinshi kezeńde halyqaralyq ǵylymı konferensııa ótkizilgen.
Al úshinshi kezeńge arqaý bolǵan tarıhı qoıylymnyń sátti shyǵýyna Gollıvýdqa áıgili «Kazakh Union Action Team» kaskaderlik toby jáne Qazaqstannyń tanymal kıno-akterlary bar, uzynyrǵasy 100-ge jýyq adam atsalysty. Bir saǵat kóleminde ótken qoıylymnan kórermen tarıhı taǵylym aldy. Bes túrli kórinisten quralǵan qoıylym jońǵar shapqynshylyǵynyń kezeńderin, shaıqas barysyn, sonymen qatar sol kezdegi qazaq aýyldarynyń turmys-tirshiligin beıneledi.
Sondaı-aq qonaqtar nazaryna «Baýyrsaq party», «Qolónershiler qalashyǵy», «Qusbegi», «Itbegi», taǵy basqa 6 túrli alańda shoý kórinister uıymdastyrylyp, halyqtyq ónerimizdiń mol muralary usynyldy.
Almaty oblysy