«Jigitke jeti óner de az» deıtin támsildi ustanatyn Baǵdat Qadyrov túrli as mázirin daıyndaýdy súıikti isine aınaldyrǵan. Alaıda barmaǵynan bal tamǵan aspaz bolý – ekiniń birine buıyra bermeıtin baq. Degenmen, atyraýlyq aspazdyń taǵamynan dám tatýdy qalaıtyndar kóp.
Jaqynda ol Túrkııanyń Antalııa qalasynda ótken Gastro Antalya gastronomııalyq festıvalǵa qatysty. Atyraýlyq aspaz jigit álemniń túrli elinen 750 aspaz qatysqan saıysta eki túrli as mázirin usyndy. Qazaqtyń ulttyq taǵamyna arqaý bolǵan etten dámdi taǵam daıyndady. Oǵan qosa balyqtan dámi til úıiretin as pisirdi.
«Kez kelgen asty shyn kóńilmen pisirý qajet. Túrli dámdeýishti qosýdyń shekti mólsherimen qosqan jón. Sonda taǵam dámdi bolady», deıdi B.Qadyrov.
Gastronomııalyq festıvaldyń qazylar alqasy Baǵdat Qadyrov daıyndaǵan eki taǵamnyń dámin tatyp, birinshi jáne ekinshi júldeni berýge sheshim qabyldady. Bul árıne, qazaq aspazynyń as mázirine ózge elderden kelgen áriptesteriniń qyzyǵýshylyǵyn oıatty.
Qazir Baǵdat Qadyrov telearnalardyń birinde óner ıelerimen birge as pisiretin baǵdarlamaǵa qatysyp júr. Instagram jelisindegi paraqshasynda as daıyndaýǵa qatysty «laıfhakyn» jarııalap júr. Onyń paraqshasyna tirkelgen 300 myńǵa jýyq oqyrman jańa as mázirin kútip otyrady.
Atyraý oblysy