Túrki qoǵamdastyǵy V dúnıejúzilik kóshpeliler oıyndaryn 2024 jyly Qazaqstanda ótkizý jónindegi usynysty biraýyzdan qoldap, Túrkııanyń Jastar jáne sport mınıstri Mehmet Kasapoglý saltanatty is-sharanyń estafetasyn elimizge tabystaǵan bolatyn.
Dúbirli dodada el namysyn qorǵaıtyn qurama qatarynan tabylýǵa nıetti jastardyń kóp ekeni, daıyndyqty bastaǵany anyq. Oǵan Arys qalasynda ótken jarysta kóz jetkizdik.
Túrkistan oblysynyń qurylǵanyna 5 jyl tolýyna oraı ulttyq sport oıyndarynyń 5 túrinen uıymdastyrylǵan «Nomads cup» kóshpendiler oıynyna óńirdiń 17 aýdan-qalasynan 200-ge jýyq sportshy qatysty. Jalpy júlde qory 2 mln teńge bolatyn saıysta jastar jamby atý, qazaq kúresi, aýdaryspaq, kókpar, arqan tartys boıynsha kúsh synasty. Tartysty ótken jarys qorytyndysynda komandalyq esep boıynsha I oryndy Tólebı aýdanynyń sportshylary jeńip alsa, II oryndy Báıdibek aýdanynyń jastary ıelendi. Al III orynǵa Arys qalasynyń qatysýshylary kóterildi. Jeńimpazdar men júldegerlerge qarjylaı syıaqylar, kýbokter men dıplomdar tabys etildi. Sondaı-aq qatysqan árbir komandaǵa 50 myń teńge kóleminde aqshalaı syılyq úlestirildi. Budan bólek, ár saıysta úzdik nátıje kórsetken 5 qatysýshyǵa jáne eń jas sportshyǵa arnaıy syılyq tabys etildi.
Aıta keteıik, jastar arasynda qazaq halqynyń ulttyq oıyndarynyń mánin, dala dástúrin, urpaqtar sabaqtastyǵyn negizge ala otyryp, el tarıhyn, bolmysyn, dástúrin nasıhattaý maqsatyndaǵy ıgi is-shara «Jastar resýrstyq ortalyǵy» KMM uıymdastyrýymen, Arys qalasy ákimdiginiń qoldaýymen ótti.
Túrkistan oblysy