Bıyl Devıs kýboginiń túrli irikteý syndarynan súrinbeı ótken álemniń eń úzdik segiz komandasy 22 qarashada Ispanııanyń Malaga qalasynda bas qosty. Olar Jerorta teńiziniń batys jaǵalaýynda ornalasqan osy ásem shaharda bes kún boıy sheberlik baıqasyp, kimniń myqty ekenin anyqtady.
Shırek fınalda Fınlıandııa men Kanada, Aýstralııa men Chehııa jáne Italııa men Nıderland quramalary biraz tiresti. Desek te sheshýshi tusta shıraq qımyldaǵan alǵashqylary jeńiske jetti. Osy kezdesýlerdiń úsheýinde de 2:1 esebi tirkeldi. Serbııaǵa Ulybrıtanııany utý esh qıyndyq týǵyzǵan joq. Olar barlyq máseleni eki sette sheshti – 2:0.
Jartylaı fınalda aýstralııalyqtar Sýomı eli ókilerin súrindirdi – 2:0. Al ıtalııalyqtar men serbııalyqtar arasyndaǵy saıys shıeleniske toly boldy. Alǵashynda Mıomır Kesmanovıch Lorenso Mýzettıdi qapy qaldyryp, óz komadasyn alǵa shyǵardy. Kelesi kezdesý qos memlekettiń maqtanyshy Novak Djokovıch pen Iаnnık Sınner arasynda ótti. Osy básekeniń favorıti Serbııanyń sańlaǵy ekeni sózsiz. Ol – búgingi tańdaǵy dúnıe júziniń birinshi raketkasy jáne álemdik tennıs tarıhynda eń kóp oljaǵa kenelgen oıynshy. Osy jaǵynan Djokovıchtiń aldyna túsetin eshkim joq. Biraq ATR tiziminde tórtinshi orynda turǵan Sınnerge bul jaǵdaı esh áser etken joq. 22 jastaǵy jalyndy jas syn saǵatta 36 jastaǵy dańqy jer jarǵan dúldúldi súrindirdi. Esep – 6:2, 2:6, 7:5.
Fınalda Italııa men Aýstralııa jolyqty. Tusaýkeser kezdesýde Matteo Arnaldı (Italııa) Alekseı Popyrındy (Aýstralııa) tize búktirdi. Odan keıin túrli sebepterge baılanysty Mettıý Ebden/Maks Persell men Sımone Botellı/Lorenso Sonego arasyndaǵy juptyq saıys ótpeı qaldy. Sheshýshi tusta Iаnnık Sınner Aleks de Mınordy 6:3, 6:0 esebimen utyp, Apennın túbegi jankúıerlerine shatttyqqa bóledi.
Sóıtip, Italııa quramasy óz tarıhynda Devıs kýbogin ekinshi márte oljalady. Birinshi ret olar 1976 jyly Chılıdiń astanasy Santıagoda ótken fınaldyq oıynda jarys qojaıyndaryn 4:1 esebimen oısyrata utyp, bas júldeni tóbelerine kóterdi. Sol juldyzdy komandanyń sapynda Korrado Baradzýttı, Paolo Bertolýchchı, Antonıo Dzýgarellı jáne Adrıano Pannatta syndy serkeler óner kórsetti. Sodan beri 47 jyl da zymyrap óte shyqty. Mine, endi Iаnnık Sınner bastaǵan saıypqyrandar bıyl tolaǵaı tabysqa qol jetkizip otyr. Sondaı-aq olardyń 1960, 1961, 1977, 1979, 1980, 1998 jyldary jalaýy jelbiregen jarystardyń fınalynda oınaǵanyn da aıta ketken abzal.
Kezinde Qazaqstannyń tennısshileri de Devıs kýboginde jaqsy óner kórsetken edi. Bizdiń jigitter 2011, 2013, 2014, 2015, 2018 jáne 2021 jyldary atalǵan jarystyń Álemdik tobynyń shırek fınalynda alty ret kúsh synasty. Odan zor bıikke kóterile almaǵanymyzben, osy mejege jetýimizdiń ózi orasan zor tabys retinde baǵalandy. О́ıtkeni Qazaqstan quramasy sapynda ataǵy alysqa jaıylǵan oıynshylar joqtyń qasy edi. Birde-bir otandasymyz esh ýaqytta, tipten, TOP-30 tennısshiniń qataryna da qosylmaǵan. Soǵan qaramastan sheshýshi tusta bir judyryq bolyp jumylyp, talaı mańyzdy matchtarda azýly qarsylastardyń aýzyn uryp kettik. О́kinishke qaraı, keıingi kezderi jolymyz bolmaı júr. Byltyr Ispanııanyń Valensııasynda uıymdastyrylǵan irikteý týrnırinde AQSh pen Ulybrıtanııaǵa jol bersek, bıyl La-Serenada Chılıge ese jiberdik. Osylaısha, sońǵy eki birdeı dúbirli dodadan shet qaldyq. Buıyrtsa, kelesi maýsymda sol olqylyqtyń orny tolyp, otandyq tennısshilerimiz zor tabysymen óz jankúıerlerin qýantady dep úmittenemiz.