Almatydaǵy Balýan Sholaq atyndaǵy Mádenıet jáne sport saraıynda estetıkalyq toptyq gımnastıkadan álem chempıonaty aıaqtaldy. Tórt kún boıy jankúıerlerdi qýanyshqa bólegen baıraqty básekede Aýstrııa, Bolgarııa, Malaızııa, Qytaı, Ońtústik Koreıa, Grekııa, Italııa, Ispanııa, Serbııa, Izraıl, Mysyr, AQSh, Qyrǵyzstan, Japonııa, Qazaqstan sportshylary baq synady. Al Reseı men Belarýs halyqaralyq federasııanyń týy astynda óner kórsetti. Barlyǵy – 17 memleket.
Estetıkalyq toptyq gımnastıkanyń otany – Fınlıandııa. Sýomı eliniń maıtalmandary uzaq jyldar boıy ádemilik pen ásemdikke negizdelgen osy sport túrin keńinen nasıhattap, aqyry ony úlken deńgeıge kóterdi. Alǵashqy álem chempıonaty 2000 jyly Helsınkıde uıymdastyrylsa, keıinnen atalǵan jarystyń jalaýy Eýropa men Amerıka qurlyqtaryndaǵy birneshe memlekette jelbiredi. Bul básekeler ár jyl saıyn úzdiksiz ótip turady. Shtab-páteri Fınlıandııanyń bas shaharynda ornalasqan atalǵan halyqaralyq uıymǵa qazirgi kezde 47 eldiń ulttyq federasııalary múshe.
Alataý baýraıynda ótken jarystyń alǵashqy eki kúninde «Almaty kýbogi» men «Tórt qurlyq birinshiliginiń» júldeleri sarapqa salyndy. Baq synaýshylar qatarynda 8 jastaǵy búldirshinderden bastap tájirıbesi tolysqan saqa sportshylarǵa deıin boldy. Birneshe jas erekshelikteri men túrli jattyǵýlar boıynsha uıymdastyrylǵan dúbirli dodada reseılik «Brıol» men «Evıta Prıma», belarýstik «Sılfıda Mıks», ońtústikkoreıalyq «SJ Tiger» jáne qazaqstandyq «Juldyz Orıon», «Fıesta», «Blossým», «Assol» klýbtary bas júldeni oljalady.
– Kúni búginge deıin Azııada birde-bir ret álem chempıonaty ótken emes. Qazaqstan sary qurlyqta birinshi bolyp osyndaı deńgeıi joǵary, mártebesi bıik dúbirli dodany qabyldap otyr. Sóz oraıy kelgende, bizge zor senim artqan Halyqaralyq estetıkalyq toptyq gımnastıka federasııasynyń basshylaryna rızashylyǵymyzdy bildiremiz. Atalǵan uıymnyń prezıdenti Lılııa Morozova Almatyǵa arnaıy kelip, jarysty basynan aıaǵyna deıin tapjylmaı tamashalady. Árıne, osyndaı zor senimniń bizge bekerden beker artylyp otyrmaǵany anyq. Qazaqstanda bul ónerdi damytyp jatqanymyzǵa asa kóp ýaqyt bola qoıǵan joq. Desek te aınaldyrǵan bes-alty jyl aralyǵynda jerlesterimiz halyqaralyq arenada aýyz toltyryp aıtarlyqtaı tabystarǵa qol jetkizdi. Búgingi tańda shákirtterimiz Azııadaǵy úzdik komandalar sanatynda. Álemdik deńgeıdegi dodadalardan da ara-tura oljaly oralyp júrmiz. Qazirgi kezde respýblıkamyzdyń 9 óńirinde federasııalar jumys istep jatyr. Olardyń 12 fılıaly bar. Bir sózben aıtsaq, elimizde sporttyń bul túrine degen qyzyǵýshylyq jyldan-jylǵa artyp keledi, – deıdi Qazaqstannyń Estetıkalyq toptyq gımnastıka federasııasynyń prezıdenti Mádına Bekturǵanova.
Keıingi kúnderi jastar men eresekter arasynda eki birdeı iri jarys ótti. Alǵashynda «Tórt qurlyq birinshiligi – Trofı» týrnıriniń tusaýy kesildi. Jastar arasyndaǵy saıysta Bolgarııanyń «Akademıgi» aldyna jan salmasa, Reseıdiń «Rýbıni» men Qazaqstannyń «Umaıy» ekinshi jáne úshinshi oryndardy ıelendi. Eresekterdiń básekesinde otandyq «Kerbez-Prımanyń» burymdylary altynnan alqa taqsa, «Efekt» kúmispen kúpteldi. Reseıden kelgen «Blesk» klýbyna qola medal buıyrdy.
Jastardyń álem birinshiliginde irikteý synynan irkilmeı ótken 12 komanda óner kórsetti. Bul saıysta alǵashqy eki oryndy Reseıdiń «Vıktorııasy» men «Madonna Jýnıory» jeńip alsa, Bolgarııanyń «National Team» men Astananyń «Samuryǵy» qola medaldi enshiledi. Eresekter jarysy shıeleniske toly boldy. Dýaly aýyz mamandardyń ózderi eń sońǵy sátke deıin kimniń ozatynyn dóp basyp aıtýǵa júreksindi. Jergilikti jankúıerler elimizdiń eń úzdik komandalary – «Frıdom» men «Sanraızǵa» aıryqsha senim artty. Biraq Mádına Mutalıeva men Janet Jaboeva jattyqtyratyn ujymdarǵa jeńis tuǵyryna kóterilý baqyty buıyrmady. Bul olardyń osaldyǵynan emes. Negizi jerlesterimiz óte jaqsy óner kórsetti. Ony mamandar da, basqalar da moıyndady. Biraq qarsylastarymyz bizden de myqty boldy. Máselen, bas júldeni oljalaǵan reseılik «Ekspressııa» 2016 jyly álem chempıony atanyp, sol jarysta taǵy 2 kúmis pen 3 qolany enshiledi. Kúmis medaldi ıelengen Bolgarııanyń «National Team» klýby – byltyrǵy álem chempıonatynyń jeńimpazy. Odan bólek, Sofııadan kelgen sulýlardyń qorjynynda jahandyq dodanyń 5 kúmisi men 4 qolasy bar. Úshinshi orynǵa taban tiregen Máskeýdiń «Madonnasy» dúnıejúzilik chempıonattarda
6 márte teńdessiz dep tanylyp, taǵy tórt ret júldegerler sanatyna qosyldy. Mine, osyndaı ataqty klýbtar otandastarymyzdyń aldyn orap ketti. Taǵy bir qola medal Bolgarııanyń ekinshi quramasyna buıyrdy. Al jalpy komandalyq esepte elimizdiń jas gımnasshylary ekinshi oryn alsa, eresekter úshinshi satyǵa turaqtady.