Otandyq IT-maman Erbol Kópjasar jasap shyqqan GoatChat qosymshasy álemdik naryqta suranysqa ıe bolyp, AI neırojelisin qoldanatyn eń tabysty 10 qosymshanyń qataryna kirdi.
Qazirgi kezeń – jasandy ıntellekt dáýiri. Onyń múmkindikterin búkil álem moıyndap jatyr. Elimizde de jasandy zerdeni ıgerýge den qoıylyp, onyń damýyna edáýir kóńil bóline bastady. Biraq bul salany ıgerip qana qoıý jetkiliksiz. Básekede alǵa jyljý úshin tutynýshydan óndirýshige aınalý qajet.
Suranysqa ıe jasandy ıntellekt qosymshasyn jasap shyqqan Erbol Ulybrıtanııada Newcastle University-de bilim alǵan. Oqýyn bitirgen soń shetelde qalyp jumys isteý múmkindigi bolsa da, elge qaıtyp kelýdi tańdaǵan. Ol osy salada kóptegen jobamen aınalysyp, tájirıbesin arttyra túsedi. Keıinnen jeke óz jobasyn bastaýǵa sheshim qabyldaǵan.
«AI-ǵa suranystyń kúrt ósip jatqanyn kórgende, endigi baǵytymyzǵa esh kúmán keltirmedik. Adamdar tehnıkalyq shekteýlerge qaramastan, jańa nársege birden aqsha tóleı bastady. Bul – tehnologııalyq serpilis. Adam neırojelimen sóılese alsa, nege Eınshteınmen sóılespeske dep oıladyq. Kez kelgen tanymal tulǵanyń atynan sóılesip, tildik modeldi úıretip alýǵa bolady. Adamdar oǵan tóleýge daıyn ekenin bilgende tańdanysymyzdy jasyra almadyq. Odan ári damıyq dep múmkindigimizdi arttyra tústik», deıdi Erbol Kópjasar.
GoatChat qosymshasy ChatGPT-ge uqsas úlken tildik modelder negizinde jumys isteıdi. Iаǵnı sıfrlyq kóshirme jasaý, sýret salý, áńgime jazý syndy múmkindikteri bar. Qosymshada tegin jáne aqyly qyzmetter qarastyrylǵan. Tegin nusqasynda 9 habarlama jiberip, 5 sýretke deıin generasııa jasaýǵa bolady. Aqyly nusqasynda shekteý joq jáne fýnksııasy kóp. Paıdalanýshylar qosymshany shekteýsiz qoldaný úshin qyzmetterdi satyp alady. Jazylý quny elge baılanysty. Mysaly, AQSh-ta aptalyq jazylym quny – $9,99, aı saıynǵysy – $24,99, al jyldyq jazylymy – $99,99. Qosymsha App Store-ǵa qańtar aıynda ornalastyrylǵan. Jyl basynan beri ony 5 mıllıonǵa jýyq qoldanýshy júktep alǵan. Sonyń nátıjesinde qazir olar AI salasyndaǵy tabysty research-kompanııaǵa aınalyp otyr.
«Bizdiń belsendi aýdıtorııamyz aıyna shamamen 1 mıllıon adamdy quraıdy. Aqpannyń sońynda turaqty satylym jasaı bastadyq. Kútpegen jerden Fransııa, Germanııa, Ońtústik Koreıa, Polsha jáne basqa elderdiń App Store-da úzdik ondyqqa kirgen alǵashqy qazaqstandyq qosymsha biz boldyq. Ol úshin bir rettik júktep alý kórsetkishiniń joǵary bolǵany emes, kúndelikti júktelim sanynyń kóp bolǵany qajet», deıdi ol.
Qosymsha avtorynyń aıtýynsha, qazir GoatChat-ta úsh negizgi bólim bar. Birinshisi – faıl júkteýge bolatyn onlaın-kómekshi. Ǵalamtordaǵy kez kelgen betti ashyp, ondaǵy aqparatty qorytyp, sonyń mazmuny negizinde adamdarmen sóılese alady. Bul jaǵdaıda tildik model ChatGPT-diń sońǵy nusqasyndaǵy derekter qoryna emes, usynylǵan aqparatqa súıenedi. Osy prınsıppen PDF-faıl júkteýge bolady. Bir ereksheligi, bul model aǵylshyn tilinde oqytylǵan. Sondyqtan orys, qazaq tilderinde jaqsy jumys istemeıdi. Ekinshisi – explore. Bul bólimde qoldanýshy naryqta bar AI chat-bottardy paıdalana alady. Olardyń kómegimen sýret, keskin, áńgime bolsyn, túrli vızýal jáne mátindik kontent jasaýǵa bolady. Úshinshisi – sıfrlyq kóshirme nemese kez kelgen keıipkerdi jasap shyǵarý qyzmeti. Jeke chat-botqa qajetti aqparatty júktese jetkilikti, ol túrli suraqtarǵa jaýap bere alady.
«Ázirge qosymshada vıdeo jasaý múmkindigi joq. О́ıtkeni bul óte qymbat. Qazaqstandaǵy óndiristik vıdeokartalardyń eń kóp sany bizde bolsa da, jabdyǵymyz buǵan jetpeıdi. Olardyń esepteý qýatyn tildik modelderdi oqytýǵa nemese kontent jasaýǵa ǵana paıdalanýǵa bolady. Tildik modelderge qatysty sheshilmegen taǵy eki másele bar. Birinshisi – «gallıýsınasııa» nemese jalǵan aqparat berý. Ekinshisi – mazmunnyń uzaqtyǵy. Chat-botpen sóılesý kezinde habarlamadaǵy sóz sanynda nemese sessııa sanynda shekteý bar. Buǵan qosa, biz qazir kitap jazyp jatyrmyz. Jańa tildik modelimiz 5 mınýtta 128 bettik oqıǵany qurap beredi. Bolashaqta onyń kómegimen kıno ssenarııin jazǵymyz keledi. Test nusqany qazirdiń ózinde 10 myń adam júktep aldy. Oqıǵa ne týraly, basty keıipker kim ekenin engizse boldy, tildik model bárin ózi jazyp beredi», deıdi E.Kópjasar.
IT-maman jasandy ıntellektiniń qaýpin joqqa shyǵarmaıdy. Sondaı-aq neırojeliniń adamdardy aýystyrýǵa qaýqary jetýi ábden múmkin dep esepteıdi.
«Open AI óz ázirlemeleriniń qaýipsizdigine shamamen 10 mıllıon dollar bóldi. Biraq bul qarajat kompanııanyń apparattyq quraldarǵa jumsaıtyn qarjysymen salystyrýǵa da kelmeıdi. Qarapaıym jáne qurylymdalǵan derekterdi jınaý múmkin emes salalarda ózgeris kóp ýaqytty alady. AI optımıster neırojeli adamdy tolyq aýystyrmaıdy, tek kómekshi qural bolady dep esepteıdi. Alaıda men olarmen kelispeımin. McDonald’s avtomatty kassalardy ornatqan boıda kompanııa kassır qyzmetkerleriniń sanyn qysqartty. Kapıtal árqashan eńbek tıimdiligin arttyrýǵa umtylady. Tıisinshe, sizdiń quzyretińizdi eshqandaı tildik nemese basqa úlgi jasaı almaıtyn salalardy izdeý kerek. Mysaly, Kalıfornııadaǵy Cruise kompanııasy júrgizýshisi joq taksı qyzmetin usynyp jatyr. Ázildeıtin shama joq. Adamdar ereýilge shyǵyp jatyr. Bul dúnıedegi ekonomıkasy eń damyǵan eldegi jaǵdaı. Munyń bári optımızm týdyrmaıdy, biraq meniń oıymsha, bara-bara jańa mamandyqtar paıda bolatyn sııaqty. Mysaly, ssenarıı avtorlary jazýdan góri ssenarııdi óńdep, ıdeıa oılap tabýmen aınalysady», deıdi qosymsha avtory.
OpenAI kompanııasy sekildi Erbol da óz jobasyn aqsha tabýdyń jolyn tapqan zertteý kompanııasy retinde qalyptastyrýdy kózdep otyr. Sonymen qatar jańa ónimder shyǵarýdy jáne jańa tehnologııalardy paıdalana otyryp, qolda bar ónimderdi jańartýdy jalǵastyra bermek.