Ádette qarasha aıynda dalada qalyń qar jatatyn. Bıyl kúz erekshe jyly. Sınoptıkterdiń aıtýynsha qarasha aıyndaǵy mundaı jyly aýa raıy sońǵy ret 2010 jyly bolǵan, dep habarlaıdy Egemen.kz.
«Qazgıdromet» RMK elimizge qalyń qar qashan jaýatynyn boljady. Ol málimet boıynsha Qazaqstannyń basym bóliginde qar jamylǵysy jeltoqsannyń birinshi onkúndiginiń sońynda túsedi. Al respýblıkanyń ońtústik-batysynda, ońtústiginde jáne ońtústik-shyǵysynda aıdyń ekinshi jartysynda qar jaýady.
Jeltoqsan aıynyń basynda Qazaqstannyń basym bóliginde jaýyn-shashyn jaýady. Sondaı-aq tuman, kóktaıǵaq kútiledi. Soltústik óńirlerde jel kúsheıip, jaıaý burqasyn soǵýy múmkin.
Jeltoqsannyń birinshi onkúndiginiń ekinshi jartysynda ońtústik aımaqtardy qospaǵanda, eldiń basym bóliginde aıaz kútiledi. Qar jaýyp, burqasyndy jel kúsheıedi, termometrlerdiń baǵandary túngi ýaqytta -10-20°S-qa, kúndiz-3-10°S-qa deıin tómendeıdi degen boljam bar.
Bıyl kúz nege jyly boldy?
Jyly kúz ben qystyń kesh kelýi batys jáne ońtústik sıklondardyń jıi oryn alýyna, sondaı-aq Iran men Jerorta teńizi aýdandarynan jyly aýa massalarynyń kelýine baılanysty. Osyǵan baılanysty Qazaqstan aýmaǵyndaǵy temperatýralyq fon klımattyq normadan 3-10° joǵary boldy. Meteobaqylaý tarıhynda osy jyldyń qarasha aıy óte jyly boldy, jyly aýa raıynyń joǵarǵy shegi 17-18 qarasha aralyǵynda baıqaldy. Sońǵy ret jyly qarasha 2010 jyly boldy, ol kezde aýa temperatýrasy normadan 2-7° aýytqydy.
Mundaı aýa raıy tarıhymyzda sońǵy ret qashan baıqaldy?
Kópjyldyq baqylaýlar boıynsha Astana qalasynda qar jamylǵysynyń eń kesh jaıǵasýy 1967 jylǵy 15 jeltoqsanda (56 jyl buryn) jáne 2008 jylǵy 14 jeltoqsanda (15 jyl buryn) tirkeldi.
Tarıhı derekterge súıenetin bolsaq, elordada qar jamylǵysynyń erte jaıǵasýy – 10 qazan, ortasha jaıǵasýy – 10 qarasha, al kesh jaıǵasýy - 15 jeltoqsan. Sońǵy úsh jylda – 2020, 2021, 2022 jyldary qarashanyń birinshi onkúndiginiń sońynda, ekinshi onkúndiginiń basynda turaqty qar jamylǵysy tirkelip, ortasha bıiktigi 8-13 sm qurady.