Elimizde qyrkúıek aıynan bastap qyzylsha juqtyrǵandar sany kúrt kóbeıdi. Bul týraly Densaýlyq saqtaý mınıstri Ajar Ǵınııat OKQ alańynda ótken baspasóz konferensııasynda aıtty, dep habarlaıdy Egemen.kz.
«Elimizde qyzylshamen aýyrǵan naýqastar úshin ınfeksııalyq aýrýhanalarda 3,5 myńnan astam tósek-oryn ashyldy. Qazir 2 myńnan astam bala stasıonarlyq em qabyldap jatyr. Naýqastar arasynda júkti áıelder de bar. Pasıentterdi tósek-orynmen qamtý 60 paıyzdy quraıdy, rezervte taǵy 1 myńnan astam tósek-oryn saqtaýly», dedi vedomstvo basshysy.
Qyzylsha boıynsha jaǵdaıdy turaqtandyrý maqsatynda josparly vaksınasııalaýmen 600 myńnan astam bala qamtyldy, bul 1 jas jáne 6 jas aralyǵyndaǵy balalardyń 84%-yn quraıdy. DDU usynymyna sáıkes bul kórsetkish 80-nen kem bolmaýy kerek. Jyl sońyna deıin osy jas tobyndaǵy 100 myńnan astam bala vaksına alýy kerek.
Ajar Ǵınııattyń aıtýynsha, qyzylshamen aýyrǵan otbasylarda ekpe almaǵan, biraq naýqaspen baılanysta bolǵan 15 myńnan astam adam shuǵyl ekpe alǵan. Buryn vaksına almaǵan 18 jasqa deıingi 63 myńnan astam adam ekpe saldyrypty.
«Qazirgi epıdemııalyq jaǵdaıǵa baılanysty 5 jasqa deıingi balalardyń arasynda syrqattanýshylyqty toqtatý úshin, ıaǵnı qyzylsha aýrýymen aýyrǵandardyń 65% balalar bolǵandyqtan, 6 qarashadan bastap osy sanat arasynda qosymsha jappaı ımmýndaý bastaldy. 100 myńnan astam bala ekpe aldy», dedi Ajar Ǵınııat OKQ alańynda ótken baspasóz konferensııasynda.