Bıyl Qyzylordada alǵash ret «Parasat joly» áleýmettik jobasy júzege asyrylyp keledi. Jas memlekettik qyzmetshilerdi mádenı-kópshilik, ıntellektýaldyq jáne sporttyq is-sharalarǵa qatystyryp, netvorkıng alańyn qurýǵa, qoldaýǵa baǵyttalǵan joba aıasyndaǵy is-sharalarǵa myńnan asa memlekettik qyzmetshi qatysty.
Aımaqtaǵy memlekettik qyzmetshilerdi qoldaý sharalary oblys ákimi Nurlybek Nálibaev pen «Parasat joly» oblystyq sleti aıasynda Syr eline kelgen Prezıdent janyndaǵy Memlekettik basqarý akademııasynyń rektory Erlan Ábildiń kezdesýinde talqylandy. Aımaq basshysy bul is-sharanyń memlekettik qyzmetshilerdiń oń ımıdjin qalyptastyrýda, tájirıbe, ózara pikir almasý alańyna aınaldyrýda mańyzy zor ekenin atap ótti.
«Memlekettik qyzmetshilerdiń biliktiligin arttyrý, qyzmettik ósýine jaǵdaı jasaý udaıy nazarda. Bıyl óńirde 96 memlekettik qyzmetker qaıta daıarlaýdan ótti, 697-si biliktilik arttyrý kýrstarynda mashyǵyn jetildirdi. О́ńirlik rezervti qalyptastyrý úshin quzyretterdi baǵalaýdy júzege asyratyn assesment qyzmetine qajetti qarjy qaralyp jatyr. Aımaqtaǵy memlekettik qyzmetshilerdiń Prezıdent janyndaǵy Memlekettik basqarý akademııasynda bilim jetildirýine, akademııa túlekteriniń el damýy jolynda eńbek etýine únemi qoldaý bildiremiz», dedi Nurlybek Mashbekuly.
Prezıdent janyndaǵy Memlekettik basqarý akademııasynyń rektory oblys ákimine kórsetken qoldaýy úshin alǵys aıtyp, aldaǵy ýaqytta da tıimdi áriptestik ornatýǵa nıet bildirdi. Oblysta 3200-den astam memlekettik qyzmetshi túrli salada eńbek etedi, 35 jasqa deıingi 471 memlekettik qyzmetshiniń jıyrmasy – Prezıdent janyndaǵy Memlekettik basqarý akademııasynyń, úsheýi «Bolashaq» baǵdarlamasynyń túlegi. Byltyr oblysta 9 memlekettik qyzmetshi Prezıdent janyndaǵy Memlekettik basqarý akademııasy grantyn ıelense, bıyl 6 memlekettik qyzmetshi akademııada jańa bilim daǵdylaryn meńgerýde.
Qyzylorda