«Kúmis jas», «Alǵashqy jumys orny», «Áleýmettik jumys oryndary» «Jastar tájirıbesi», «Urpaqtar sabaqtastyǵy» sekildi baǵdarlamalar jumysmen qamtý jumystaryna serpin berip jatyr. Buǵan qosa 2021-2025 jyldarǵa arnalǵan kásipkerlikti damytý jónindegi ulttyq joba da – jumyssyzdyqty joıýǵa kúsh.
Osy baǵytta Shahtınsk shaharynda jyl basynan beri 59 múmkindigi shekteýli adam jumysqa ornalasqan. Olar úshin arnaıy jumys oryndary qurylsa, jumys berýshiler memleketten sýbsıdııa alady. Shahtınsk qalalyq «Mansap» ortalyǵynyń jetekshisi Rústem Manapov Eńbek jáne halyqty áleýmettik qorǵaý mınıstrligi jumys oryndaryn qurýǵa arnalǵan shyǵyndardy sýbsıdııalaýdy engizgenin jáne ortalyqqa jyl basynan beri 63 múgedektigi bar adam júgingenin aıtady.
«Olardyń 59-yn jumysqa ornalastyrdyq. Jumys berýshilerdi múgedek adamdardy jumysqa ornalastyrýǵa qyzyqtyrý úshin Eńbek jáne halyqty áleýmettik qorǵaý mınıstrligi jumys oryndaryn qurýǵa arnalǵan shyǵyndardy sýbsıdııalaýdy engizdi. Iаǵnı kompanııa basshysy jumys keńistigin uıymdastyrady, al memleket 300 AEK-ke deıingi shyǵyndardy óteıdi. Buǵan qosa osy jyldan bastap jumys berýshilerge múgedektigi bar adamdardyń jalaqysyn sýbsıdııalaý bastaldy. Jumys istegen birinshi jyly memleket – 70%, ekinshi jyly – 65% jáne úshinshi jyly jalaqy mólsheriniń 60%-yn sýbsıdııalaıdy», deıdi.
Shahtınsk qalasynda óz kásibin dóńgeletip otyrǵan «Aızere» ámbebap tigin kásiporny 2017 jyly ashylǵan. Sol kezde bes adammen jumys bastapty. Tigin sehynyń búginde jumysy jetilip, bes jyl ishinde 20 shaqty sheberdi jumyspen qamtyp otyr.
Seh polısııa qyzmetkerlerine, dárigerlerge jáne basqa da tapsyrys boıynsha kıim tigedi. «Mansap» ortalyǵynyń usynysymen taǵy tórt adamdy jumysqa qabyldaǵan. Bireýi – «Áleýmettik jumys ornyna», úsheýi «Kúmis jas» jobasy boıynsha jumysqa ornalastyrǵan. Jumyskerlerdiń jalaqysy memleket esebinen sýbsıdııalanady. «Bizde turaqty óndiris bar, tapsyrys jetkilikti. Men taǵy 10 adamdy qabyldaýǵa daıynmyn», deıdi seh basshysy Q.Saýhanova.
Svetlana Rıabseva – «Mansap» ortalyǵyna júgingenderdiń biri. Eki aıdan beri osy sehta jumys isteıdi.
«Jasym 52-de, tiginshimin. Qulaǵymnyń múkisi bar. Buryn biz Almatyda turdyq, sol jerde meniń kishkentaı atelem boldy. Birneshe jyl buryn otbasymmen Dolınkaǵa kóship keldik, bir jyldan asa ýaqyt jumys taba almadym. Maǵan «Mansap» ortalyǵyna júginýge keńes berdi, sol jerden maǵan jumys tabyldy. Sehta maǵan bári unaıdy, ujym óte jaqsy», deıdi S.Rıabseva.
Seh basshysy Q.Saýhanova bolsa, Svetlananyń jumysqa degen yntasynyń joǵary ekenine rıza.
«Svetlanany jumysqa alýdy maǵan «Mansap» ortalyǵy usyndy. Ol bizde ekinshi aı jumys isteıdi, ózin jaqsy maman retinde kórsetti. Tiginshilik qabileti zor», deıdi Q.Saýhanova.
Seh ıesi múgedektigi bar adamdarǵa qolaıly jaǵdaı jasaý úshin eki ınfraqyzyl bólikten jáne Braıl shrıftindegi aqparattyq kórsetkishten turatyn arnaıy jaryq shamshyraǵyn satyp alypty. Bul erekshe qyzmetkerler úshin nusqaýlyq retinde qyzmet etedi. Memleket jaryq shamdaryn satyp alý shyǵyndaryn ótep berdi. Bul da bolsa kásiporyn úshin úlken qoldaý.
Qaraǵandy oblysy,
Shahtınsk qalasy