Batys Qazaqstan oblysynyń Shyńǵyrlaý aýdanynda «Bala tili – bal» atty festıval ótti. Eki týrdan turatyn saıysqa aýdannyń ár aýylynan 33 baldyrǵan qatysyp, maqal, jańyltpash aıtýdan jarysyp, ónerlerin ortaǵa saldy.
Aýdandyq mádenıet bóliminiń bas mamany Hamıdolla Islamqulovtyń jobasy retinde jyl saıyn ótetin bul is-shara bıyl aýdan ákimi Murat О́mirálıevtiń qoldaýymen erekshe sıpat tapty. Shyńǵyrlaý aýdandyq mádenıet úıiniń bı zalynda oıyn túrinde, vıktorınalyq suraqtarmen órilgen saıysty aýdandyq kitaphana qyzmetkerleri uıymdastyrdy. Balalar-jasóspirimder sport mektebiniń dırektory Manarbek Bektııarov festıvalǵa qatysqan ónerli baldyrǵandarǵa demeýshilik kórsetip, táttiler men syılyqtar alyp berdi. Aýdannyń jeke kásipkerleri Sánııa Námıeva, Edil Turmaǵambetov, Aqmaral Isanova, Zýhra Haırýllına, Álibek Islambekovter de barynsha qoldaý kórsetti.
– Baıqaýdyń birinshi bólimi onlaın túrinde ótti. «Maqal – sózdiń máıegi» atty saıysqa balalar tórt maqal men jańyltpashty aıtyp, beınetúsirilim joldady. Al ekinshi bólimde aýdandaǵy ár balabaqsha men bóbekjaı tárbıelenýshileri án aıtyp, bı bılep, ónerin kórsetti. Biz baldyrǵandardy kishkentaıynan shyǵarmashylyqqa baýlyp, sahnaǵa alyp shyǵýdy maqsat ettik, – deıdi aýdandyq mádenıet, tilderdi damytý, dene shynyqtyrý jáne sport bóliminiń basshysy Oljas Seıtimov.
Shynynda da, bul festıval aýdan kóleminde erekshe oqıǵa boldy. О́nerli órender de, olardyń ata-analary da taqymyn qysyp, sahna sıqyrynyń «dámin tatty». Festıvalǵa qatysqan baldyrǵandar alǵyshatpen, estelik syılyqtarmen marapattaldy.
Aıta keteıik, búginde Shyńǵyrlaý aýdanynda 8 balabaqsha jumys isteıdi. Ol jerde 800-ge tarta bala tálim-tárbıe alyp jatyr.
Batys Qazaqstan oblysy