Erevanda ótip jatqan álem birinshiliginde elimizdiń jasóspirimder quramasy sapynda 13 boksshy óner kórsetip, solardyń toǵyzy alǵashqy aınalymdardan asa almaǵany jaıynda biz buǵan deıin de baıandaǵanbyz.
Keshe shırek fınaldyq saıystar bastaldy. Bul mejede Tólebek Nurasyl (54 kg) rýmynııalyq Mıhaı Renetony jaqsylap turyp sabady. Ekinshi jáne úshinshi raýndtarda qandasymyz qarsylasyn da nokdaýnǵa jiberdi. Onyń aldynda ol Zımbabveniń ókili Shon Pambenıdi bas kótertpeı utqan edi. Komandalyq áriptesiniń jeńisti jolyn Álıhan Ásker (60 kg) jalǵastyra almady. Ol ıordanııalyq Muhamad Abýlla Zedaǵa ese jiberdi. Keshe Nyǵmet Nuǵyman (48 kg) jáne Igor Solovev (75 kg) rıngke shyqty.
Erevannyń sharshy alańynda uldarǵa qaraǵanda qyzdarymyz áldeqaıda tabysty óner kórsetip jatyr. Shırek fınalda Sıla Bıbolsynqyzy (48 kg) Trınıdada men Tobagonyń týmasy Reı Djondy úsh ret uryp qulatqannan keıin tóreshiniń jekpe-jekti toqtatýdan basqa amaly qalmady. Aıajan Sydyq (54 kg) reseılik Vladıslava Sılınany qýyp júrip sabady. Gaýhar Zarden (50 kg) meksıkalyq Valerııa Amparan Pısarromen ábden «tiresti». Qazylar alqasy biraz oılana-tolǵana kele jeńisti jerlesimizge berdi. Tolǵanaı Qasymhan (60 kg) rýmynııalyq Kala Lamýra Bronseadan basym tústi. Al Panar Seıthanqyzy (+80 kg) úndistandyq Prachı Tokaspen aıanbaı aıqasty. Desek te tóreshiler jeńiske Úndi eli ókilin laıyq dep tapty.