Beısenbiniń tańy jaısyz habarmen bastaldy. Almatydaǵy Ádı Sháripov kóshesi, 86 meken-jaıynda ornalasqan ǵımarattyń jertólesinen shyqqan órt saldarynan 13 adam qaıtys boldy. Tómengi qabaty men jertólesi jataqhanaǵa aınalǵan 3 qabatty turǵyn úıdiń basqa da turǵyndary qaýipsiz jerge evakýasııalanyp, 2 azamat qalalyq shuǵyl kómek kórsetý aýrýhanasyna jetkizildi.
Zardap shekkender – turǵyn úıdiń birinshi qabatynda ornalasqan «Almaty Hostel» jataqjaıynyń qonaqtary. Almaty qalalyq Polısııa departamentiniń habarlaýynsha, qaıtys bolǵan 13 adamnyń tórteýi sheteldik, qalǵan 9 adam – Qazaqstan Respýblıkasynyń azamattary. Aldyn ala málimet boıynsha olar kómirtegi totyǵynan ýlanyp qaıtys bolǵan. Al aýrýhanaǵa jetkizilgenderdiń ómirine qaýip tónip turǵan joq.
Qalalyq densaýlyq saqtaý basqarmasynyń málimetine sáıkes, naýqastyń birine kómirqyshqyl gazynan ýlaný dıagnozy qoıyldy. «Onyń jaǵdaıy ortasha aýyr turaqty dep baǵalanyp otyr. Qalǵan tórt naýqas barlyq tekserýden keıin usynystarmen ambýlatorlyq emdelýge jiberildi», dep habarlady sala ókilderi.
Almaty qalalyq Tótenshe jaǵdaılar departamentiniń málimetinshe, oqys oqıǵa týraly habar jedel jelige tańǵy saǵat 05:33-te kelip túsken. Oqıǵa ornyna jeti mınýtta jetken órt sóndirýshiler kólemi 30 sharshy metr aýmaqty sharpyǵan qyzyl jalyndy 06:22-de tolyq aýyzdyqtaǵan.
Jergilikti ákimdik evakýasııalanǵandardy jaqyn mańdaǵy mektepterdiń birine ýaqytsha ornalastyryp, azamattarǵa qajetti medısınalyq jáne psıhologııalyq kómek kórsetildi. Tosyn jaǵdaıǵa baılanysty Premer-mınıstr Álıhan Smaıylovtyń ókimimen hostelde bolǵan órttiń sebepterin tekserý jáne onyń saldaryn joıý jónindegi Úkimettik komıssııa quryldy. Keıinirek órt faktisi boıynsha Qylmystyq kodekstiń 292-babyna sáıkes qylmystyq is qozǵaldy.
Tótenshe jaǵdaılar mınıstri Syrym Sháriphanovtyń basshylyǵymen TJM-nyń jedel toby oqıǵa ornyna arnaıy kelip, órttiń shyǵý sebepterin tekserdi. Aldyn ala derekter boıynsha órt oshaǵy jertóleniń dálizinde bastalǵan bolýy múmkin. Almaty qalasy TJD órt synaý zerthanasynyń anyqtaýshylary men mamandary jan-jaqty tekserý jumystaryn júrgizip jatyr.
Jeli qoldanýshylary órt bolǵan jataqjaı basshylyǵyn synǵa alǵan. Olardyń pikirinshe, aıadaı bólmege ondaǵan adamdy ornalastyrý qaýipsizdik talaptaryna qaıshy. Degenmen buǵan deıin jarııalanǵan pikirlerde hosteldiń reıtıngi joǵary kórsetkishpen baǵalanypty. Jarnamalyq habarlandyrýda bir kisilik orynnyń quny aıyna 25 myń teńge dep kórsetilgen. Bir jarym aı buryn hostel retinde qaıta jabdyqtalǵan nysan «Halyq banktiń» ıeliginde. Uıym ony kepilmúlik retinde jalǵa bergen.
Oqıǵa ornyna jetken qala ákimi Erbolat Dosaev qujattardyń tekseriletinin, apattyń mán-jaıy anyqtalyp, zardap shekkenderge qala bıligi tarapynan jan-jaqty kómek kórsetiletinin jetkizdi.
«Jalpy, jertóleni sanıtarlyq talaptarǵa sáıkes jabdyqtaýǵa bolady. Biraq osynshama kóp adamdy ornalastyrýǵa ruqsat bar ma? Zań sheńberinde anyqtaımyz, arnaıy tergeý júredi», dedi E.Dosaev.
Almaty ákiminiń baspasóz qyzmeti tústen keıin taratqan aqparatta bul hostel sanıtarlyq-epıdemıologııalyq, qurylys talaptary men órt qaýipsizdigi erejelerin buza otyryp, zańsyz ornalasqandyǵy habarlandy.
«Jer ýchaskesiniń nysanaly maqsaty – dúkendi paıdalaný jáne qyzmet kórsetýge arnalǵan. Bul nysan bir jarym aı buryn hostelge aınaldy. Hostel alańy 457 sharshy metrdi quraıdy. Aıta keterligi, «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» zańǵa sáıkes úı-jaılardy qaıta jabdyqtaý kezinde ruqsat qujattaryn alý kerek. Onyń ústine Almatynyń qalalyq josparlaý jáne ýrbanıstıka basqarmasy qaıta jabdyqtaýǵa arnalǵan bastapqy ruqsat qujattaryn (APZ, sheshim) bermegen. Dúkenniń hostel bolyp fýnksıonaldyq maqsaty ózgergen kezde sanıtarlyq-epıdemıologııalyq, qurylys talaptary men órt qaýipsizdigi erejeleri oryndalýy qajet. Hosteldi jertóle jáne jertóle qabattarynda ornalastyrýǵa sanıtarlyq-epıdemıologııalyq talaptardyń 23-tarmaǵyna sáıkes tyıym salynady», dep habarlady Almaty qalasy ákiminiń baspasóz qyzmeti.
«Qaýip tóngende qarbalaspaı, qala qurylysyndaǵy qaýipsizdik talaptaryn tekserý jaı kezde nege júzege aspaǵan?» degen saýal týyndaıdy. Megapolıste eki kúnniń birinde órt faktisi tirkelip jatady. Tamyz aıynda salǵyrttyqtyń saldarynan «Aqkent» turǵyn úı kesheninde adam shyǵynymen aıaqtalǵan oqıǵany sarapshylar synǵa alǵan edi. Tótennen tóngen tilsiz jaý zań talaptary men qarapaıym erejelerdi eskerýge, quzyrly oryndar tarapynan olardy tekserýge laıyqty mán berilmeıtinin taǵy da bir kórsetip otyr. Bul oqıǵadan da Almatynyń órt qaýipsizdigin qadaǵalaý isine keshendi kózqaras qajet ekenin baıqaımyz.
ALMATY