Májilistiń jalpy otyrysynda «AMANAT» partııasy fraksııasynyń jetekshisi Elnur Beısenbaev Premer-mınıstrdiń orynbasary Tamara Dúısenovaǵa joldaǵan depýtattyq saýalynda ekpe alýdyń qoǵam úshin mańyzdylyǵyna toqtaldy, dep habarlaıdy Egemen.kz.
Depýttattyń aıtýynsha sońǵy kezderi balalar arasynda túrli aýrýlardyń dendep bara jatqany alańdatyp otyr.
«Úkimet otyrysynda osy másele kóterilgeninen qulaǵdarmyz. Onda elimizde 17 myńnan astam qyzylshamen aýyryp tirkelgenderdiń 82%-y balalar degen málimet keltirildi. Al onyń kóbi vaksına almaǵan balalar eken. Arasynda 30-daı bala jansaqtaý bóliminde jatqan kórinedi. Bul – dabyl qaǵarlyq jaǵdaı. Qyzylsha asqynyp ketse, balalar densaýlyǵyna qaýip tóndiretini belgili. Sondyqtan muny densaýlyq saqtaý salasy ókilderine ǵana ysyryp qoımaı, bunymen búkil qoǵam bolyp kúresýdiń qajettiligi aıqyn», dedi Elnur Beısenbaev.
Depýtat E.Beısenbaevtyń aıtýynsha nebir indetter vaksına oılap tabylyp, jappaı egilgennen keıin beti qaıtqany málim. Balalaryn mindetti egýden birqatar ata-ana bas tartyp otyr. Ekpeler jeke adamnyń densaýlyǵy úshin ǵana emes, búkil qoǵam saýlyǵy úshin de qajet. Osyǵan oraı, halyq arasynda aqparattyq-túsindirý jumystaryn keńinen júrgizýdiń mańyzy zor.
Sonymen qatar depýtat Premer-mınıstrdiń orynbasaryna atalǵan máselege baılanysty birqatar naqty usynysty aıtty.
«Birinshiden, elimizde balalardyń vaksınasııalanýy boıynsha tolyq túgendeme júrgizip, olardyń arasyndaǵy aýrý túrlerine, vaksınasııalaýmen korrelıasııasyna jan-jaqty saraptama jasaý kerek. Ekinshiden, jergilikti atqarý organdarymen jáne buqaralyq aqparat quraldarymen birlese otyryp, halyq arasynda keń kólemdi aqparattyq-túsindirý jumystaryn júrgizý qajet. Úshinshiden, osy kezge deıin túrli sebeptermen egilmeı qalǵan balalardy jáne dúnıege kelip jatqan sábılerdi vaksınasııalaýdan ótkizýdi qolǵa alý kerek», dedi «AMANAT» partııasy fraksııasynyń jetekshisi Elnur Beısenbaev.