Búgin elimizdiń ár túkpirinde 96 jańa mektep ashyldy. Bul týraly Oqý-aǵartý mınıstrliginiń baspasóz qyzmeti habarlady, dep jazady Egemen.kz.
Jyl aıaǵyna deıin taǵy 132 myń orynǵa arnalǵan 154 mektep paıdalanýǵa berilmek. Onyń 62-si Bilim berý ınfraqurylymyn qoldaý qory esebinen salynyp jatyr. Bul 12 apatty jáne 29 úsh aýysymdy mekteptiń máselesin, 113 eldi mekendegi oqýshy oryndarynyń tapshylyǵyn sheshedi.
«Sondaı-aq «Jaıly mektep» ulttyq jobasy iske asýda. Bıyl 217 mekteptiń qurylysy bastaldy, olar 2024 jyldyń sońyna deıin paıdalanýǵa beriledi. Ulttyq joba eń aldymen qalalar men keleshegi bar eldi mekenderde jańa úlgidegi mektepterdi salýǵa, oqýshylar men pedagogterge jaıly ári qaýipsiz orta qalyptastyrýǵa, bilim berý qyzmetiniń sapasyn arttyrýǵa baǵyttalǵan», delingen habarlamada.
Jalpy, Memleket basshysynyń tapsyrmasy boıynsha elimizde 740 myń oqýshyǵa arnalǵan 369 «Jaıly mektep» salý josparlanǵan.