Ústel tennısinen Slovenııanyń Nova-Gorısa qalasynda ótip jatqan jastar arasyndaǵy álem birinshiliginiń juptyq saıystarynda jerlesterimizdiń jeńilis tapqanyn biz buǵan deıin de jazǵanbyz.
Kóp uzamaı jekelegen básekeler bastaldy. О́kinishke qaraı, Sarvınoz Mirqadyrova germanııalyq Annett Kaýfmannan 0:4 esebimen oısyraı utyldy. Esesine Alan Qurmanǵalıev bul jarysty jeńispen bastady. Jergilikti jankúıerler Brın Vovkke barynsha qoldaý kórsetkenine qaramastan ol alǵashqy aınalymda slovenııalyq oıynshyǵa 4:2 esebimen san soqtyrdy. Kelesi kezeńde qazaqtyń óreni Qytaıdyń ókili Ven Rıbıomen ábden tiresti. Desek te bul báseke Qytaı eli ókiliniń paıdasyna sheshildi – 2:4.
Al elimizdiń birinshi raketkasy Kırıll Gerasımenko Germanııanyń Dıýsseldorf qalasynda uıymdastyrylǵan WTT Feede týrnıriniń shırek fınalyna deıin jetti. Bul básekeniń bas júldesin jergilikti sportshy Mengel Shteffen jeńip aldy.