Elimizdiń tuńǵysh Prezıdenti Nursultan Nazarbaevtyń «Meniń ómirim. Bodandyqtan – bostandyqqa» atty jańa kitaby jaryq kórdi. Memýar avtory ómir jolymen qatar, otyz jyl ishinde bolǵan mańyzdy saıası oqıǵalar, ekonomıkalyq reformalar, kúrdeli halyqaralyq kelissózder, qabyldanǵan strategııalyq sheshimder týraly áńgimeleıdi. Táýelsizdiktiń eleń-alań kezindegi bastamalarǵa toqtala kele, qańtar oqıǵasyna qatysty oı-paıymdaýlaryn da bildirgen.
Kitap «Memýar muraty», «Ushqan uıa», «Jol basy», «Temirtaý taǵylymy», «Bılik baspaldaqtary», «Qıly kezeń», «Jeltoqsan», «Qaıta qurý: qyzyǵy men shyjyǵy», «Polıgon», «Eleń-alań», «Tańsári», «Teńge – tirek», «Jekeshelendirý: jalpydan – jalqyǵa», «Parlament: taratý ma, taraý ma?», «Eldik emtıhany», «Astana», «Soqpaqsyz syrtqy saıasat», «Shegendelgen shekara», «Bitimgerlik belesteri», «О́mir órimderi», «Saıasat synaǵy», «Erteńi eńseli el» atty taraýlardan, al taraýlar birneshe bólimnen turady. Taraýlardyń taqyryptary aıtyp turǵandaı, kóziqaraqty oqyrman tek qaıratkerdiń ózindik ómir jolyn ǵana emes, Qazaqstannyń táýelsizdik jyldary qalyptasýy men damýyn oısha barlap, jaýapty da kúrdeli kezeńniń derekterine kóz jetkizedi.
Avtor óz ǵumyrynyń ózegin jınaq jelisi etip ala otyryp, qarapaıym aýyldan ósip jetilgenin, marten men domna peshteriniń janynda metallýrg, eńbekker retinde shyńdalǵanyn, iskerlik, uıymdastyrýshylyq qabiletimen tanylyp, qoǵamdyq, basqarýshylyq qyzmetterge erkin tartylǵanyn, sol jol Úkimet basshylyǵynan egemen eldiń alǵashqy Prezıdenti dárejesine deıin alyp kelgenin, ǵasyrlar toǵysynda el men jer taǵdyry tarazyǵa túsken almaǵaıyp kezeńde, talaı-talaı syn saǵattarynda qaıratker, saıasatker retinde ózine júktelgen asa zor jaýapkershilikti qal-qadirinshe atqarǵanyn baıandaıdy.
Aıta ketelik, burynyraqta da N.Nazarbaev jaıynda birneshe ómirbaıandyq kitap pen tarıhı zertteý jazylǵan. Jýrnalıst Beıbit Saparalynyń «Tuńǵysh Prezıdenttiń balalyq shaǵy» kitabynan bastap, ár jyldary saıasatkerdiń ómiri men qyzmetiniń ár kezeńine arnalǵan birshama derekti kitap, jınaq jaryq kórgeni belgili. Sheteldik eńbekterdiń arasynan brıtandyq jazýshy Dj.Aıtkenniń, reseılik qalamgerler N.Zenkovıch, R.Medvedev, L.Mlechın, S.Plehanov, O.Vıdovanyń kitaptaryn ataýǵa bolady.
Qansha degenmen memýarlyq kitaptyń jóni bólek. Sol turǵyda avtordyń ózi de atap ótkendeı, bul kitapty ómirbaıan dep te, tarıhı zertteý dep qaraýǵa bolmaıdy. Kitapta saıasatker ómiriniń bel-belesterin sóz etedi, qos ǵasyr ıininde ózi kórgen nemese taǵdyryna áser etken oqıǵalar jóninde jazady. О́tken ómir jolyn jadynda jańǵyryp, jyldar boıy jınaǵan tájirıbesine, kórgen-bilgenine, basynan keshken talqy taǵdyryna taldaý jasaı otyryp, burnaǵy jáne qazirgi qym-qýyt qubylystardy oı eleginen ótkizýge tyrysady. Sondyqtan da kitapta negizgi nazardy ózine aýdaryp ketetin tustar da kezdesedi. Alaıda kitapty oqyǵan adam úshin eń bastysy – osy týyndy arqyly eldiń búginge deıin júrip ótken jolyn, bolashaǵyn avtordyń tanymy arqyly tarazylaıdy.
Qandaı da qubylystyń baǵasyn ýaqyt pen tarıh beredi. Al tarıh – eń aldymen, sol eldiń adamdarynyń taǵdyry. Adamdardyń tarıhynan el taǵdyry, ıaǵnı memleket taǵdyry quralady. Memleket tarıhyna sol eldiń basqarý bıligi qolynda bolǵan adamnyń basqalardan kóbirek yqpal ete alatyny óz-ózinen túsinikti bolsa kerek. Sol turǵyda kitapty paraqtaǵanda saıası tulǵanyń kózqarasy arqyly eldiń tarıhyn baıyptaǵandaı bolasyz. Ǵumyrbaıandyq kitap ǵasyrlar toǵysyndaǵy kezeńniń bar synaǵyn, aýyrtpalyǵyn, shıelenisken, sapyrylysqan saıasat sahnasynda betpe-bet kelip, eńsere bilgen qıly qıyndyqtaryn ashyq, artyq boıaýsyz jetkize bilgendigimen de qundy jáne bul eńbekti bostan dáýirdiń derekti jazbasy deýge negiz bar.
Ádette memýar janrynda jazylǵan eńbekterdegi málimetterdiń shynaıylyǵy men naqtylyǵy avtor jadynyń myqtylyǵyna, parasat-paıymynyń júıeliligine baılanysty. Osy turǵydan kitap ómirbaıandyq jazba bolǵanymen, týyndy avtordyń jeke ómirimen tuıyqtalyp qalmaǵan. Sol oraıda qoǵamdaǵy iri oqıǵalar men belgili ózgeristerdiń basy-qasynda bolǵan qaıratker tulǵa estelikteriniń tarıhı máni asa zor.
Saıası qaıratkerlerdiń, ásirese memleket basshylarynyń qaı-qaısysynyń bolsyn memýarlyq eńbegin oqysańyz, avtordyń álemdik sańlaq saıasatkerlermen arada bolǵan qarym-qatynasy, olar týraly oı-tolǵamy qyzyqtyrady. Aıtalyq, N.Nazarbaev Memleket basshysy Qasym-Jomart Kemeluly jóninde: «Qandaı orynda da onyń bólekshe bilimdiligi, ishki mádenıeti, uıymdastyrýshylyq qabileti, boıyna o bastan bitken ustamdylyǵy, keńestik dıplomatııanyń bıik mártebesinen ótken kásibıligi kórinip turatyn. Qazaqstannyń kópvektorly syrtqy saıasatyn qalyptastyrýda, ásirese aınalamyzdaǵy elderdiń bárimen shekarany delımıtasııalap alýymyzda onyń bilimi kómekke keldi», dep jazady.
Kez kelgen halyq óziniń ulttyq tarıhyn jasaýda jazba derektermen birge, tarıhı tulǵalardyń estelikterin, kúndelikterin, joljazbalaryn paıdalanýy – ejelden bar úrdis. Tarıhı derektermen memýarlyq shyǵarmalar arasyndaǵy baılanys pen birlikti, shynaıylyq pen alshaqtyqty salystyryla taldaýdan ótkizý arqyly jasalǵan tarıhtyń shynaıylyǵy qashanda joǵary bolady. Osy turǵydan alǵanda, táýelsizdikti baıandy etý jolyndaǵy túrli tartysty, taǵdyrsheshti oqıǵalardy, birin-biri qaıtalamaıtyn qabyrǵaly tulǵalar bolmysyn, júzdegen is-sharany, myńdaǵan adam taǵdyryn qamtyǵan N.Nazarbaevtyń bul kitaby memleket jáne qoǵam qaıratkeriniń paıymy, kózqarasy, tolǵamy retinde saıasattaný sóresinen óz ornyn alady dep senemiz.