Elordada qyzylsha aýrýy dendep barady. №3 kópbeıindi qalalyq balalar aýrýhanasynyń ınfeksııalyq stasıonarynda 200-ge jýyq bala qyzylshadan em alyp jatqanyn, onyń basym bóligi – ýaqtyly ekpe almaǵandar ekenin elorda ákimdiginiń resmı saıty habarlady, dep jazady Egemen.kz.
Aýrýhanada jatqan analar arasynda ekpe alýdyń mańyzdylyǵyn túsingender kóp. Balalaryna ýaqtyly ekpe saldyrmaǵan analar men der kezinde vaksına jasatqan analar oılaryn bólisti.
«Balamnyń 5 kún boıy qyzýy kóterildi. Densaýlyǵy jaqsarmaı jatqanyn kórip, jedel medısınalyq járdem shaqyrdyq. Balam sóıleı almaı, tura almaı qatty aýyrǵan edi. Eger de ekpe alsam, bul jaǵdaı bolmaýshy ma edi dep oılaımyn. Vaksına saldyrǵan úlken balam jeńil túrde aýyryp, tez saýyǵyp shyqty. Endi aldaǵy ýaqytta qyzylsha aýrýynan ekpeni aldyn ala mindetti túrde alatyn bolamyn», dedi Darıǵa О́teshova.
Qazirgi tańda, Qoǵamdyq densaýlyq saqtaý basqarmasymen qyzylsha aýrýynyń aldyn alý, emdeý jáne ımmýndaý boıynsha tıisti jumys júrgizilip jatyr.
Jalpy, qabyldaý bólmesinde dárigerlerdi qabyldaýdyń 8 beketi, onyń ishinde qyzylsha boıynsha qabyldaý bólmesinde 2 beket uıymdastyryldy. Táýekel tobyndaǵy balalarǵa (Triage – júıesi boıynsha qyzyl tús) kezekten tys qyzmet kórsetiledi. Sondaı-aq árbir ınfeksııalyq bólimshede qosymsha orta medısınalyq personaldyń taǵy bir beketi ornalastyryldy.
Eske salaıyq, elordada 6 aıdan bastap, 10 aı 29 kúnge deıingi sábılerdi jappaı vaksınasııalaý júrip jatyr. Olarǵa jeltoqsan aıynan bastap, 2-4 jas aralyǵyndaǵy balalar qosylady.
«Naýqaspen baılanys bolǵan jaǵdaıda, qosymsha ekpe alý úshin kez kelgen turǵyn turǵylyqty mekenjaıy boıynsha emhanaǵa júginýi kerek ekenin eske salamyz. О́zińizdiń jáne jaqyndaryńyzdyń densaýlyǵyn saqtańyz!», delingen Qoǵamdyq densaýlyq saqtaý basqarmasy taratqan habarlamada.