Qylmystyń óteýi – jaza. Ásirese mal urlaǵandarǵa qarsy qoldanylatyn jaza qatańdatylǵanymen, tórt túlikti qoradan da, óristen de qoldy etetinder azaıar emes. Máselen, Atyraý oblysynda jyl basynan beri 24 mal urlyǵy tirkelgen.
Oblystyq polısııa departamenti krımınaldyq polısııa basqarmasynyń bólim basshysy, polısııa podpolkovnıgi Abaı Jumabaevtyń málimetinshe, mal urlyǵyna baılanysty 9 kúdikti ustalǵan. Kúdiktilerdiń deni – tepse temir úzedi deıtindeı jas jigitter.
«Mal urlyǵy ásirese aýyl turǵyndaryn mazalap otyr. Sol sebepten «Múlikti qorǵaý jónindegi 2021-2023 jyldarǵa arnalǵan baǵdarlamasyn iske asyrý jónindegi is-sharalar» jospary jasaqtaldy. Atalǵan josparǵa sáıkes jergilikti atqarýshy organdarmen birge mal urlyǵynyń aldyn alý, qylmysty ashýǵa baǵyttalǵan birqatar is-shara qabyldandy. Veterınarııa ókilderimen arada qol qoıylǵan memorandýmǵa saı arnaıy jumys toby quryldy», deıdi A.Jumabaev.
Polısııa ókiliniń deregine súıensek, óńirde maldy ýaqytsha ustaýǵa arnalǵan 9 arnaıy oryn ashylǵan. Maldy qujatsyz tasymaldaǵan 41 adam ákimshilik jaýapkershilikke tartylypty. Al qaraýsyz júrgen 651 mal arnaıy orynǵa qamalǵan.
«Buryn mal urlaǵan kúdiktiler men jábirlenýshiniń tatýlasýyna baılanysty qylmystyq is toqtatylatyn edi. Ishki ister mınıstrliginiń usynymen Qylmystyq kodekske ózgerister men tolyqtyrýlar engizildi. Endi mal urlyǵynyń jeke normasyna sáıkes kináliler 5 jyldan 12 jylǵa deıin bas bostandyǵynan aıyrý jazasyna tartylady. Bul ózgeris 2020 jyldyń 11 qańtarynda zańdy kúshine endi», dep málim etti A.Jumabaev.
О́tken aptada Inder aýdandyq sotynda mal urlaǵan úsh sottalýshyǵa qatysty qylmystyq is qaraldy. Eki turǵynǵa Qylmystyq kodekstiń 188-1-baby 3-bóliginiń 1, 2-tarmaqtarymen, al úshinshisine 188-1-baby 2-bóliginiń 1-tarmaǵymen aıyp taǵylǵan. «Sottalýshylar aldyn ala sóz baılasyp, bótenniń aýlasyna kirip, birneshe ret mal urlaǵan. Úshtiktiń bireýi aldyn ala sóz baılasý arqyly bótenniń malyn óristen jasyryn jymqyrǵan. Sottalýshylardyń kinási is materıaldarymen tolyqtaı dálelin tapty», dep habardar etti aýdandyq sottan.
Mal ıelerine 1 mln 700 myń teńge kóleminde zalal keltirilgen. Sot úkimimen sottalýshylardyń ekeýi Qylmystyq kodekstiń 188-1-baby 3-bóliginiń 1,2-tarmaqtarymen kináli dep tanyldy. Olarǵa múlkin tárkilemeı, 5 jyl 6 aı merzimge bas bostandyǵynan aıyrý jazasy taǵaıyndaldy. Al úshinshi sottalýshy Qylmystyq kodekstiń 188-1-baby 2-bóliginiń 1-tarmaǵymen kináli dep tanylyp, oǵan múlkin tárkilemeı, 3 jyl merzimge bas bostandyǵynan aıyrý jazasy taǵaıyndaldy.
Atyraý oblysy