Jezókshelik – qoǵamnyń derti. О́kinishke qaraı quqyq qorǵaý organdary tarapynan buǵan qarsy ymyrasyz kúres júrgizilip jatsa da, jaman kásipti násipke aınaldyrǵandar aıylyn jııar emes.
182 boıjetken esepte tur
Ishki ister mınıstrligi taratqan málimetke súıensek, taıaý kúnderi shymkenttik polıseıler jezókshelik qyzmet kórsetken úsh prıtondy japqan. 31 jastaǵy áıel prıton uıymdastyrý úshin 3 páterdi uzaq merzimge jalǵa alyp, ıntımdik qyzmet kórsetetin 10 qyzdy ustaǵan. Soraqysy, onyń bireýi kámelettik jasqa da tolmaǵan. Tánin satqandar – Shymkent, Taraz, Almaty, Qostanaı qalalarynyń turǵyndary.
Jeńgetaılyq jasady dep kúdikke ilingen áıeldiń turǵylyqty mekenjaıyn tekserý barysynda iri mólsherde mefedron esirtki zaty tárkilendi. Osy derekterge qatysty Qylmystyq kodekstiń 309-baby 2-bóligi (Jezókshelikpen aınalysýǵa arnalǵan prıtondar uıymdastyrý nemese olardy ustaý jáne jeńgetaılyq) men 296-baby 3-bóligi (Iri mólsherdegi esirtki, psıhotroptyq zattardy, sol tektesterdi ótkizý maqsatynsyz zańsyz daıyndaý, qaıta óńdeý, ıemdený, saqtaý, tasymaldaý) boıynsha sotqa deıingi tergeý amaldary júrgizilip jatyr. Kúdikti áıel qamaýǵa alyndy.
Dál osyndaı áıel adam Abaı oblysynda da polısııa qyzmetkerleriniń quryǵynan qutylmady. Polisia.kz saıty taratqan málimetke qaraǵanda, jyl basynan beri Abaı oblysynyń jedel qyzmetkerleri jezókshelik qyzmet kórsetken 6 saýnany jaýyp, 5 áıeldi 2 jylǵa shartty túrde sottaǵan. Sondaı-aq osy jyly tánin satyp paıda taýyp kelgen 44 áıel jedel esepke alyndy. Búginde Abaı oblysy boıynsha jalpy sany 182 áıel esepte tur.
Al Túrkistan oblysy polısııa departamentiniń uıymdasqan qylmysqa qarsy kúres basqarmasynyń qyzmetkerleri Arys qalasy saýnalarynyń birinen jeńgetaılyqpen aınalysty degen kúdikke ilingen 50 jas shamasyndaǵy áıeldi ustaǵan. Onyń qaramaǵynda elimizdiń 4, О́zbekstan Respýblıkasynyń bir azamaty bar bolyp shyqty. Olardyń qandaı «kásippen» aınalysqany aıtpasa da túsinikti...
Aty – massaj salony, zaty – basqa...
Qaraǵandy oblysy Polısııa departamenti uıymdasqan qylmysqa qarsy kúres basqarmasynyń qyzmetkerleri oblys ortalyǵynda úsh massaj salonynyń zańsyz qyzmetin anyqtap, jolyn kesti. Olardyń ataýy massaj salony bolǵanymen, shyn máninde klıentterge ıntımdik qyzmet kórsetken.
Ýchaskege jalpy sany 16 adam jetkizilip, 5 adamǵa, ıaǵnı salon ıeleri men ákimshilerine qatysty Qylmystyq kodekstiń 309-baby boıynsha sotqa deıingi tergeý júrgizilip jatyr. Tıisti saraptamalar taǵaıyndaldy. Jezókshelikpen aınalysýǵa tartý faktisi anyqtaldy. Buǵan qosa, jezókshelikpen jáne jeńgetaılyqpen aınalysý úshin úı-jaılardy usynǵan adamdarǵa qatysty úsh ákimshilik materıal jasaldy. Mundaı quqyq buzýshylyq 100-den 1000 aılyq eseptik kórsetkishke deıin aıyppul salýǵa ákep soǵady.
– Intımdik qyzmet kórsetetin adamdardy anyqtaý jáne ustaý boıynsha jumystar turaqty negizde júrgiziledi. О́tkiziletin is-sharalardyń maqsaty – jezókshelikpen, basqa da oǵan ilespe quqyq buzýshylyqtarmen aınalysýǵa tartý faktilerin anyqtaý. Azamattarymyzdy jezókshelikpen jáne basqa da qylmystarmen baılanysty kez kelgen kúdikti áreketter týraly baıqap jatsa, polısııaǵa habarlap, quqyq buzýshylyqtardyń aldyn alý boıynsha ýaqtyly aldyn alý sharalaryn qabyldaýǵa shaqyramyz, – deıdi oblystyq PD uıymdasqan qylmysqa qarsy kúres basqarmasy qyzmetkerleri.
Jezókshelerdiń biri – transseksýal...
Atyraý oblysy polısııa departamentiniń uıymdasqan qylmysqa qarsy kúres basqarmasynyń qyzmetkerleri «Quqyqtyq tártip» is-sharasy barysynda ıntımdik qyzmet kórsetetin saýnany anyqtady. Ol jerde Shymkent qalasy Almaty jáne Jambyl oblystarynan kelgen 8 adam klıentter «kóńili» úshin jumys istegen. Saýna ákimshisine qatysty Qylmystyq kodekstiń 309-baby boıynsha qylmystyq is qozǵaldy.
Tártip saqshylarynyń nazaryna ilikken jezókshelerdiń biri – Tájikstan Respýblıkasynyń 26 jastaǵy transseksýal azamaty. Ol ınternet jelisi arqyly ıntımdik qyzmet kórsetý úshin tapsyrys qabyldaǵan. Elimizge qarasha aıynda kelgen sheteldik azamatqa qatysty elden shyǵarý jóninde is-qujattar kóshi-qon basqarmasyna tapsyryldy. Barlyq anyqtalǵan adamdar jezókshelikpen aınalysatyndar esebine tirkeldi.
Mańǵystaý oblysynda júrgizilgen respýblıkalyq «STOP-trafık» jedel aldyn alý is-sharasy aıasynda «Kyzdar.net» saıtyna monıtorıng jasaǵan uıymdasqan qylmysqa qarsy kúres basqarmasynyń qyzmetkerleri jaldamaly páterlerde jezókshelikpen aınalysqan 35 qyz-kelinshekti anyqtap, arnaıy esepke qoıdy. Onyń ishinde úsh áıel arnaıy qabyldaý-taratý ortalyǵyna ornalastyryldy.
Sondaı-aq áleýmettik jelilerdi tekserý kezinde jańa týǵan sábılerdi satý sekildi adam saýdasymen aınalysqan 42 jastaǵy kúdikti azamat ustaldy. Onyń turǵylyqty mekenjaıyn tintý nátıjesinde esirtkige uqsas zatty saqtaǵany anyqtalyp otyr.
Qazirgi tańda IIM-niń aýmaqtyq bólinisteri el kóleminde jappaı reıdter júrgizip jatyr. Sonyń aıasynda kútpegen oqıǵalar da kezdesti. Máselen, taıaý kúnderi Túrkistan oblysynda 18 jyl boıy habar-osharsyz ketken adam retinde izdeýde júrgen áıel Atyraý oblysynan tabylǵan. Sóıtse ol 16 jasynda ata-anasymen ursysyp, 2005 jyly úıinen ketip qalypty. Sodan túrli qalalarda turǵan. Almaty jáne Shymkent qalalarynda tazalaýshy bolyp jumys istegen. Al birneshe kún buryn Qulsary qalasyna kelgen. Atalǵan derek boıynsha Túrkistan oblysynyń polısııa departamentine dereý habar berip, azamat týystarymen baılanysqa shyqty. Jeke basyn kýálandyratyn qujattary joq áıel qazirgi tańda polısııa baqylaýynda. Ony týystaryna jiberý úshin tıisti sharalar qabyldanyp, quqyqtyq keńes berildi.