Medısına salasyndaǵy múmkindikterdi aýyl turǵyndary da paıdalanýy kerek. Zamanaýı qondyrǵylar úlken qalada ǵana emes, aýdan ortalyqtarynda, ne bolmasa shalǵaı eldi mekenderde qoljetimdi bolsa ıgi. Qazir óńirde osy baǵytta júıeli jumystar júrip jatyr. Osy oraıda Kóksý aýdandyq ortalyq aýrýhanasynda alǵashqy medısınalyq áleýmettik kómektiń «Úzdik tájirıbe ortalyǵy» ashyldy. Bul shıpa izdegen turǵyndarǵa senim syılaıdy.
Kóksý aýdanynyń ortalyǵy Balpyq bı aýylynda ondaǵan myń halyq turady. Mańaıdaǵy aýyldarda asa alys emes. Kóbine halyq ortalyqqa kelip emdelgendi jón sanaıdy. Osy rette halyqaralyq standartqa sáıkes aýdan turǵyndaryna medısınalyq kómek kórsetýdiń sapasyn jaqsartý maqsatynda ashylǵan ortalyqtyń halyqqa tıgizer paıdasy zor.
Is-sharada aýdan ákiminiń mindetin atqarýshy Erjan Shalqybekov mundaı úzdik tájirıbelik ortalyqtardyń mańyzy zor ekenin aıtyp, aýdan jurtshylyǵyn salamatty ómir saltyn ustanýǵa shaqyrdy.
«Biz halyqqa qyzmet etip qana qoımaı, densaýlyq saqtaý salasyndaǵy bilimin de arttyrýymyz kerek. Aýdan turǵyndarynyń deni saý bolýy úshin aq halatty abzal jandarǵa artylatyn júk aýyr. Mundaı ortalyqtar bizde kóp bolýy kerek. Osy baǵyttaǵy jumystar odan ári jalǵasyn tabady. Eń bastysy, aýyrmaıtyn jol izdep, salamatty qazaq sanyn arttyraıyq», dedi E.Shalqybekov.
«Primary Health Care» Ulttyq qaýymdastyǵynyń prezıdenti, medısına ǵylymdarynyń doktory, professor Tólebaı Rahypbekov mundaı ortalyqtar Dúnıejúzilik densaýlyq saqtaý uıymynyń úzdik ádistemesi boıynsha iske asyrylyp jatqanyn aıtyp, aýdan jurtshylyǵyn quttyqtap, dárigerler jumysyna sáttilik tiledi.
«Qaladaǵy aıtýly emhanalardyń aýyldyq jerdegi aýrýhanalardan aıyrmashylyǵy bolmaýy kerek. Biz qazir syrttaǵy bilikti mamandarǵa usynys tastap, isine adal jastardy jumysqa aldyq. Emhanamyzda zaman talabyna saı túrli dertti anyqtaıtyn qurylǵylar bar. Qazir halyqqa shama-sharqymyzsha kómek kórsetip jatyrmyz. Jaqynda Ulttyq akkredıttiń birinshi sanatyn aldyq. Jańa ashylǵan ortalyq halyqqa da, aq halatty abzal jandarǵa da jańa múmkindik syılaıdy», deıdi aýrýhana basshysy Jannur Syrymov.
«Úzdik tájirıbe ortalyǵy» ashylǵaly emhana qurylymyna kóptegen oń ózgeris engizildi. Atap aıtqanda, emhanada ózine-ózi qyzmet kórsetý buryshy, halyq keńesi, trenıng ortalyqtary, patronajdyq qyzmettiń ámbebap-progressıvti model bólmesi, densaýlyq mektepteri jáne otbasylyq medısınanyń jańa modeli óz jumysyn júıeli júrgizip keledi. Ortalyq jumysynyń nátıjesinde jańa medısınalyq-áleýmettik kómektiń qoljetimdiligi men sapasy jaqsarmaq. Sonymen qatar aýdan turǵyndarynyń salamatty ómir saltyn ustanýyn arttyrýǵa zor yqpal etedi.
Is-shara sońynda jınalǵan kópshilik ortalyqtyń jumysymen tanysyp, arnaıy ashylǵan kabınetterdi aralap, dárigerler jumysymen tanysty.