Astanada Jaqsylyq Úshkempirov atyndaǵy jekpe-jek saraıynda taekvondodan VI jazǵy Spartakıada ótti. Tórt jylda bir ret uıymdastyrylatyn aıtýly doda úsh kúnge ulasyp, 179 sportshy óz áleýetin synady, dep habarlaıdy Egemen.kz.
Spartakıada saıysyna jazǵy Azııa oıyndarynyń qola júldegeri Smaıyl Dúısebaı, Rıo, Tokıo Olımpıadalarynyń qatysýshysy Rýslan Japarov, jazǵy Ýnıversıada oıyndarynyń chempıony Rıta Bakısheva syndy úzdikter de qatysyp kúshin baǵamdady. Jeńimpazdar men júldegerlerdi marapattaǵan Týrızm jáne sport mınıstri Ermek Marjyqpaev fınaldyq aıqastyń tartysty ótkenin aıtty.
«О́ńirlerden kelgen sport sheberleri ózara kúsh synasyp, jankúıerlerge óz sheberligin pash etti. Jarys barysynda tóreshiler ádil jumys istegenin, al el spartakıadasy joǵary deńgeıde uıymdastyrylǵanyn atap ótken jón. Sportshylarymyzdy jarqyn jeńisterimen shyn júrekten quttyqtaımyn. Endigi kezekte namysty qoldan bermeı, álemdik saıysta úzdikter qatarynan kórinýine tilektespin», dedi mınıstr.