Astanada 6 qarashadan bastap qyzylshaǵa qarsy jappaı ımmýndaý júrip jatyr. 6 qarasha kúni 6 aıdan bastap, 10 aı 29 kúnge deıingi sábılerdi jappaı qosymsha vaksınasııalaý bastaldy. Olarǵa jeltoqsan aıynan bastap, 2-4 jas aralyǵyndaǵy balalar qosyldy. Vaksınany tirkelgen jeri boıynsha emhanalarda tegin alýǵa bolady. Astananyń bas memlekettik sanıtarlyq dárigeri Sarhat Beısenova qalanyń kommýnıkasııalar qyzmetinde ótken brıfıngte vaksınasııa týraly aıtyp berdi, dep jazady Egemen.kz.
Elordada 6 jeltoqsan kúni barlyǵy 16 447 adam vaksınasııalandy. Jappaı vaksınasııa qaladaǵy epıdemıologııalyq jaǵdaıdy turaqtandyrýǵa múmkindik beredi dep atap ótti sanıtarlyq dáriger.
«Bizdiń búgingi basty mindetimiz – qyzylshadan bolatyn ólim men asqynýlardyń aldyn alý.Vaksınasııa ınfeksııa oshaqtarynda da júrgiziledi, onda 1733 baılanysqan adam ekpe aldy, sondaı-aq qyzylshaǵa qarsy ekpe almaǵan 18 jasqa deıingi adamdar anyqtaldy, búgingi kúni jyl basynan beri 14 374 adam anyqtaldy, onyń ishinde 12 746 (88%) ekpe aldy», dep habarlady Sarhat Beısenova.
Sanıtarlyq dáriger aýrýdyń alǵashqy belgileri baıqalǵan boıda dereý dárigerlerdiń kómegine júginý kerektigin eskertedi.
Olarǵa mynalar jatady: temperatýranyń 38-40°C deıin kóterilýi; bas aýrýy, álsizdik; tábettiń tómendeýi; konıýnktıvıt, rınıt, jaryqqa qaraı almaý; qurǵaq, aýyr jótel; daýystyń qarlyǵýy; qyzylsha enantemasy – tańdaıdaǵy jumsaq jáne qatty úlken qyzyl daqtar, aýrýdyń shamamen 3-4 kúninen keıin denege túsetin bórtpe.
«Qyzylshaǵa qarsy vaksınasııa – qyzylshaınfeksııasyn, sondaı-aq onyń asqynýyn boldyrmaıtyn jalǵyz tıimdi qural. Osyǵan baılanysty ata-analardy óz balalarynyń densaýlyǵyna jaýapkershilikpen qaraýǵa, vaksınany ýaqytynda alýǵa, sondaı-aq qyzylshaǵa qarsy qosymsha jappaı ımmýndaý aıasynda balany vaksınasııalaýǵa shaqyramyn», dedi elordanyń sanıtarlyq dárigeri.