Bakýde Qazaqstannyń Ázerbaıjandaǵy mádenıet kúnderi ótti. Qazaqstan-Ázerbaıjan qarym-qatynasyn nyǵaıtý maqsatynda ózara mádenı kúnderdi ótkizý týraly bıyl memleket basshylary Qasym-Jomart Toqaev pen Ilham Álıev kelisim jasasqan edi, dep jazady Egemen.kz.
Qazaqstannyń Ázerbaıjandaǵy mádenıet kúnderi aıasynda Mádenıet jáne aqparat mınıstri Aıda Balaeva Kavkaz musylmandary basqarmasynyń tóraǵasy sheıh ýl-ıslam Allashúkir Pashazademen kezdesti.
Aıda Balaeva A. Pashazadeni «Dostyq» ordenimen quttyqtap, álemdik jáne dástúrli dinder lıderleri Seziniń hatshylyǵyna qatysyp, belsendilik tanytqany úshin jáne osy mańyzdy is-sharaǵa turaqty qoldaý kórsetkeni úshin alǵys aıtty.
Mınıstr Sheıhtiń aımaqtyq jáne jahandyq jalpy álemdik aýqymdy beıbitshilik pen konfessııaaralyq kelisimdi nyǵaıtýdaǵy rólin erekshe atap ótti.
Kavkaz musylmandary basqarmasynyń tóraǵasy Allashúkir Pashazademen kezdesýde rýhanı yntymaqtastyq máseleleri, sondaı-aq konfessııaaralyq kelisimdi qamtamasyz etý máseleleri talqylandy.
Jıynǵa Ázerbaıjan Respýblıkasynyń Dinı uıymdarymen jumys jónindegi memlekettik komıtettiń tóraǵasy Mýbarız Gýrbanly, Ázerbaıjan Parlamentiniń vıse-spıkeri Fazaıl Ibrahımlı, sondaı-aq depýtattar, zııaly qaýym men túrli dinı konfessııa ókilderi qatysty.
Aıda Balaeva jınalǵandarǵa Prezıdent Q.Toqaevtyń basshylyǵymen Qazaqstanda bolyp jatqan ózgerister týraly aıtyp, baýyrlas halyqtardyń dostyǵy men yntymaqtastyq baılanystaryn barlyq salada nyǵaıta beretinine senim bildirdi.
О́z kezeginde sheıh ýl-ıslam Allashúkir Pashazade Álemdik jáne dástúrli dinder kóshbasshylary seziniń mańyzdylyǵyna toqtalyp, Astananyń din, memleket jáne qoǵam qaıratkerlerin biriktiretin erekshe dıalog alańyna aınalǵanyn atap ótti.