Kelesi jyldyń 27 qańtarynda elordadaǵy «Qazaqstan» jabyq ǵımaratynda jeńil atletıkadan «Astana Indoor Meet» dep atalatyn asa iri halyqaralyq týrnır ótedi. Atalǵan jarysqa jerlesterimizden bólek, alys-jaqyn shet memleketterden biraqtar tanymal sportshy qatysady.
Kúni keshe ǵana atalǵan jarysty uıymdastyrýshylar jaǵymdy jańalyqpen bólisti. Ataǵy alysqa jaıylǵan 24 jastaǵy syryqpen sekirýshi Arman Dıýplantıs Astanadaǵy dúbirli dodaǵa qatysýǵa óz kelisimin bergen eken. Ol AQSh-tyń Lýızıana shtatynda dúnıegen kelgenimen, óziniń barlyq tabysyna Shvesııanyń týy astynda óner kórsetken kezde qol jetkizdi. Armannyń ákesi amerıkalyq bolǵanymen, anasy – shved. Sol Bolashaq juldyz naǵashylary mekendegen memlekettiń azamattyǵyn alýdy jón kórdi.
2015-2017 jyldar aralyǵynda jastar arasyndaǵy jarystarda Dıýplantıs jasyndaı jarqyldap, talaı rekordty jańartty. Eresekter dýyna qosylǵannan keıin de ol birden daralandy. Skandınavııalyq saıypqyran Eýropa chempıonatyn eki ret utyp, eki dúrkin álem chempıony jáne bir márte sol básekeniń kúmis júldegeri atandy. Jabyq ǵımarattaǵy jarystarda da qarsylas shaq keltirmedi. 2021 jyly Tokıo Olımpıadasynda aldyna jan salmady. О́ziniń eń keremet kórsetkishine Arman 2020 jyldyń 17 qyrkúıeginde qol jetkizdi. Rımde ótken kezekti bir jarysta Shvesııa sportshysy 6 metr 15 santımetrge sekirip, Ýkraınanyń sańlaǵy Sergeı Býbkanyń baqandaı 16 jyl boıy murty buzylmaı turǵan rekordyn jańartty. Odan keıin sol nátıjesin birneshe márte jaqsartty. Qazirgi kezde onyń rekordy – 6,23 metr. Jabyq ǵımaratta Dıýplantıs 6,20 metrge sekirdi. Bul kórsetkishterdi jańartýǵa ázirge jer-jahandaǵy birde-bir jeńil atlettiń qarym-qabileti jetetin emes.
Joǵarydaǵy jańalyqty estip, kádimgideı qýanyp qaldyq. О́ıtkeni dál osyndaı deńgeıdegi jeńil atlet elimizge buryn-sońdy at basyn burmaǵan. Mine, endi Arman Dıýplantıs Astanaǵa keledi. Shvesııanyń maqtanyshy Arqa tósinde álemdik rekordty qaıta bir jańartsa, osy tarıhı sáttiń kýási bolý baqyty bizge de buıyratyn edi.
Esterińizge sala keteıik, byltyr ótken «Astana Indoor Meet» týrnırinde amerıkalyq Maıkl Rodjers (60 metr, erler), horvatııalyq Marına Bloýdek (800 metr, erler), efıopııalyq Álı Amdılmana (3 000 metr, erler), kýbalyq Rodjer Irıbarn (60 metrge kedergiler arqyly júrgirý, erler), portýgalııalyq Arıalıs Hosefa Gandýlla (60 metr, áıelder), kenııalyq Djarınter Mavııa Mvasııa (1 500 metr, áıelder), ózbekstandyq Darııa Reznıchenko (uzyndyqqa serkirý) syndy tanymal sportshylar top jardy. О́z otandastarymyz arasynan Mıhaıl Lıtvın (400 metr), Elına Mıhına (400 metr) jáne Nadejda Dýbavıskaıa (bıiktikke sekirý) dara shyqty.