Elordada «Ulttyq Ustaz» onlaın akademııasynyń uıymdastyrýymen «Ýnıversıtetterdiń jańa úlgileri. Version 5.0» taqyrybynda «Ulttyq rektorlar mektebi» semınary ótti. Joǵary bilim salasyndaǵy mańyzdy is-shara osymen úshinshi ret uıymdastyrylyp otyr.
Jıynnyń basty maqsaty – ýnıversıtette ózgerister engizýge jáne joǵary oqý oryndarynda jańa model qalyptastyrýǵa qabiletti bilim kóshbasshylarynyń basqarýshylyq múmkindikterin damytý. Rektorlar mektebinde oqý oryndarynyń jańa modelderi, bilim berý júıesindegi menedjment, Alfa urpaǵy úshin ýnıversıtetterdiń transformasııasy, elimizdegi alǵashqy robot-pedagog, jasandy ıntellekt, HR jáne adam kapıtaly, Homelander urpaǵyn basqarý jáne yntalandyrý syndy taqyryptar qamtyldy.
– Memleket basshysy Qasym-Jomart Toqaev bıylǵy kóktemde Parlament palatalarynyń birlesken otyrysynda: «Bilim berý júıesindegi menedjmentti jaqsartýǵa basa mán berilýge tıis. Osy salaǵa naǵyz kásibı mamandardy tartý qajet. Bizde prezıdenttik jastar kadrlyq rezervi bar. Dál sol sııaqty bilim salasyna ózgeris ákeletin 1 myń maman arnaıy daıyndyqtan ótedi. Osyǵan oraı, tıisti baǵdarlama qabyldanady. Kadr máselesi joǵary bilim berý júıesi úshin de óte ózekti», degen bolatyn. Shynymen de, elimizde úlken ózgeristerdiń basy dál osy joǵary bilim salasynyń kásibı mamandaryn daıarlaýǵa qatysty bolyp otyr. Ońtústik Afrıkadaǵy Stellenbosh ýnıversıtetinde mynandaı túsinik bar: «Kez kelgen ultty joıý úshin atom bombalaryn nemese alys qashyqtyqqa ushatyn zymyrandardy qoldaný qajet emes. Ol úshin tek bilim sapasyn tómendetip, stýdentterge emtıhan kezinde alaıaqtyq jasaýǵa múmkindik berse bolǵany. Sondaı alaıaqtyqtyń saldarynan naýqastar dárigerlerdiń qolynan qaza tabady, ǵımarattar tájirıbesiz ınjenerlerdiń kesirinen qıraıdy, aqshany da bilimsiz ekonomıster ıgere almaıdy, bilimsiz zańger men stýdent kezinde alaıaqtyqqa jol bergen sýdıalardyń saldarynan ádiletsizdik ornaıdy. Bilimniń kúıreýi – ulttyń kúıreýi». Tutas eldiń bolashaǵy dál osy joǵary oqý ornynda beriletin bilimge tikeleı baılanysty deýimizdiń tórkini osynda jatyr. Jasandy ıntellekt, sıfrlyq júıeler damyǵan zamanda, jahandaný kúsheıgen shaqta bilim salasyndaǵy úlken ózgeristerdiń negizgi irgetasy sanalatyn zańdardy ózgertý mańyzdy, – dedi Parlament Senatynyń depýtaty Bıbigúl Jeksenbaı.
Joǵary oqý oryndary qaýymdastyǵynyń prezıdenti Rahman Alshanovtyń pikirinshe, qazirgi tańda saıasat, ekonomıka, tehnologııa, óndiris, ǵylym-bilim salalarynda úlken ózgerister oryn alyp jatyr. Sáıkesinshe, maman daıarlaý ońaı emes. Sol sebepti basshylar men rektorlardyń ózi áýeli osy ózgeristerge saı bolýy qajet. «Qazirgi tańda joǵary oqý ornyn basqarý úshin shet tilin biletin, shetelde oqyp kelgen rektorlardy tańdap jatamyz. Al erteńgi kúni olar jergilikti jaǵdaıdan habarsyz bolsa qaıtemiz? Sondyqtan bizdiń maqsatymyz – elimizdegi máselelerdi biletin, kez kelgen jaǵdaıǵa daıyn mamandardy daıarlaý. Bolashaq maman ózgeristen qoryqpaıtyn, ishki máselelerdi qıyndyqsyz sheshe alatyn azamat bolýǵa tıis», dedi ol.
Úsh kúnge sozylǵan semınarǵa elimizdiń jetekshi joǵary oqý oryndarynyń rektorlary, prorektorlar men dekandar, joǵary bilim salasyndaǵy mamandar qatysty. «Otandyq joǵary oqý oryndary bilim berý júıesin túbegeıli ózgertip, basqarýdyń jańa modýline kóshýi qajet. Sebebi ýnıversıtet baǵdarlamalary jańa mamandyqtardyń suranysyna saı emes», degen oı aıtty sarapshylar.
Erkenaz QORDABAI,
L.N.Gýmılev atyndaǵy EUÝ stýdenti