Jaqynda elge esimi belgili, zań salasynyń beldi ókili Balapan Ábenovti eske alýǵa arnalǵan shaǵyn fýtbol týrnıri Kenshiler astanasyna alys-jaqynnan dop dodasynyń óren júırikterin jınady. Bul joly respýblıkalyq dop dodasy 2010-2011 jyly týǵan jetkinshekter arasynda uıymdastyryldy. Týrnırdiń ashylý rásimine Balapan Ábenovtiń dostary men týystary, zııaly qaýym ókilderi qatysty.
Balapan Ábenov 1960 jyly Qarqaraly aýdanynda dúnıege kelgen. Eńbek jolyn 1977 jyly N.Ábdirov atyndaǵy keńsharda tokar bolyp bastaǵan. 1983 jyly E.Bóketov atyndaǵy Qaraǵandy memlekettik ýnıversıtetine oqýǵa túsip, zańger atandy. 1988-1999 jyldar aralyǵynda Qaraǵandy oblysynyń prokýratýrasynda jumys istedi. Qatardaǵy tergeýshiden Temirtaý qalasy prokýrorynyń orynbasary qyzmetine deıin joǵarylaǵan. 1999-2005 jyldar aralyǵynda oblystyq ádilet departamenti bastyǵynyń orynbasary, keıin oblystyń sottar ákimshisi boldy. Oblys ákiminiń keńesshisi qyzmetin de atqarǵan. 2016 jyly 26 jeltoqsanda Arqa jurty ardaqty azamatynan aıyryldy.
Tirshiliginde ádildigimen, týra sózimen jurttyń júregine jol tapqan azamat. Zań salasynda shendi qyzmetter atqaryp, elge shapaǵatyn kóp tıgizgen. Tirshiliginde syılasqandar «búginginiń bıi edi» dep tebirenispen esine alady.
B.Ábenovti eske alýǵa arnalǵan bul týrnır 2018 jyldan bastap ótip keledi. Bıylǵy týrnırdiń ashylý rásimine Joǵarǵy sottyń sýdıasy Dosjan Ámirov pen memlekettik jáne qoǵam qaıratkerleri Eraly Toǵjanov, Kamaltın Muhamedjanov, Parlament Májilisiniń depýtaty Qudaıbergen Beksultanov, Qazaqstannyń eńbek sińirgen qaıratkerleri Rymbala Omarbekova, Jaqsykeldi Kemalov, aqyn, Abaı atyndaǵy memlekettik syılyqtyń ıegeri Serik Aqsuńqaruly, qalalyq máslıhattyń tóraǵasy Altyntóre Bókenov, zańgerdiń ustazy Nursahan Beısenbekova jáne ózge de qadirli qonaqtar qatysty. Meımandar qadirli azamat týraly esti estelikterimen bólisti. Oblystyq dene shynyqtyrý jáne sport basqarmasynyń basshysy Temirhan Abylaev bul týrnırdiń mańyzy men máni zor ekenin atap ótti.
– B.Ábenovtiń ǵumyry kelte bolsa da, halqyna kóp paıdasyn tıgizip, jaqsylyq jasap ketti. Juldyzdaı jarq etti. Atpaldaı azamattyń keshken ǵumyry talaıǵa úlgi. Elimizde B.Ábenovteı azamattar kóbeıse degen tilek bar. Osy týrnırdiń mańyzy zor. Sebebi onyń esimi el jadynan óshpeýge tıis. Marqumdy eske alyp, osyndaı dop dodasynyń ótýine yqpal jasap júrgen dostaryna, baýyrlaryna, týǵan-týysqandaryna alǵys. Jaqsynyń jaqsylyǵy aıtylǵany abzal. Myna jastar da óz isiniń sheberlerine aınalyp, keleshekte el namysyn álemdik deńgeıde qorǵasa deımiz, – dedi T.Abylaev.
– Arqada B.Ábenovtiń jaqsylyǵyn kórmegen adamdar óte az. Marqum tirshiliginde talaıǵa sharapatyn tıgizdi. Qınalǵandardyń qasynan tabyla bildi. Parasat pen aqyldyń ıesi edi. Márt, jomart edi. Bárine aqylshy boldy. El tizginin ustaǵan nebir shendiler Balapan marqumnan kelip aqyl suraıtyn. Ádildikti jaqtaǵan, memleket múddesi úshin aıanbaı ter tókken halqynyń asyl perzenti. Mundaı azamattar júz jylda bir týady, – dep ádil azamat jaıynda tebirene sóıledi aqyn Serik Aqsuńqaruly.
Týrnırde Abaı aýdanynan kelgen komanda sheber oıyn kórsetip, 1-oryndy qanjyǵalady. Bıylǵy týrnırge tyńǵylyqty daıyndalypty. Alańda pressıngti kóp jasap, qarsylasqa artyq qadam jasatpady. Túrli kombınasııalardy júzege asyrdy. Dop dodasynda jasyndaı jarqyraǵan fýtbolshylarǵa medal men kýbok jáne aqshalaı syılyq tabystaldy. 2-oryn Qaraǵandyǵa buıyrsa, 3-oryn – Temirtaýdyń qorjynynda.
E.Bóketov atyndaǵy Qaraǵandy ýnıversıtetiniń basqarma tóraǵasy Nurlan Dýlatbekov bilim ordasynyń atynan arnaıy júldeler tabystady. Týrnırde erekshe oıyn órnegin kórsetken oıynshylar da eskerilip, olarǵa syılyqtar tartý etildi.
Qaraǵandy oblysy