Qazaly aýdanynda keńes odaǵynyń batyry Úrmásh Túktibaev esimin ıelengen aýyl bar. Ádepkide irgesi qalanǵanyna keler jyly 85 jyl tolatyn osy baıyrǵy jurttyń ózge eldi mekenderden kóp aıyrmashylyǵy joqtaı kórinetini bar.
Sonaý 1939 jyly Alǵa, Jańabasshylyq, Bozkól jáne Jańajol kolhozdaryn biriktirý arqyly qurylǵan aýyl 1956-1966 jyldary Karl Marks atyndaǵy kolhoz bolypty. Eldegi aǵaıynnyń tirligine baılanysty Oktıabr kúrish keńshary atanǵan da kezi bar. 80-jyldardan bastap keńes odaǵynyń batyry Úrmásh Túktibaevtyń esimimen atalyp kelgen meken osy kúni Alǵa aýyldyq okrýginiń ortalyǵy sanalady. Esimi eldi meken ataýyn ıelengen Úrmásh Túktibaev – 1917 jyly osy topyraqta dúnıege kelip, ekinshi dúnıejúzilik soǵysta 27 jasynda Latvııanyń Lýdzasynda jan qıǵan batyr.
2 myńǵa jýyq turǵyny bar bul aýylda jastar kóp. Jumysqa jaramdy jurttyń bári qol qýsyryp qarap otyrǵan joq. Egin egip, mal baǵyp, tirshilik kóshine ilesip keledi. 400-den asa bala №88 Baıjigit Ábdirazaqov atyndaǵy orta mektepte bilim alady. Byltyr osy bilim oshaǵyn bitirgen 21 oqýshynyń 17-si grant ıelenip, joǵary oqý ornyna túsipti. Mektep ǵımaratyndaǵy №20 «Jaına» balabaqshasyna baratyn sábı qatary qalyń.
Bala demekshi, eger osy aýylda dúnıege kelgen egizderdi toptasa, bir qaýym elge aınalar edi. Sonaý 1973 jyly aýyldaǵy Orynbaevtar shańyraǵynda Asqar, Gaýhar atty egiz dúnıe esigin ashypty. Tórt jyldan keıin ózge de otbasylarda Aıgúl-Nurgúl Begalıevalar, Altynbek-Bolatbek Áláýovter, Qanat-Janat Júginisovter dúnıege kelip, ińgálap jatypty.
Odan keıin de ár jyldarda qos-qostan týǵandar az emes. El táýelsizdik alǵan 1991 jyly aýyldaǵy úsh úıelmende Erjan-Nurjan, Janarys-Bekarys, Almat-Samat sekildi egizder dúnıege kelipti. Qazir bul jigitter ár salada jemisti eńbek etip keledi.
Jalpy, qazaqtyń jan sanamaıtynyn bilemiz. Sol yrymǵa qyryn kelmes dep eseptep kórsek, sonaý 1973 jyldan beri osy aýylda 24 egiz týypty. Aldy elýdegi, sońy 5 jasqa endi iligetin sol egizderdi jınap, 48 adam qatysqan sherý ótkizýge de bolady eken.
Osydan 4 jyl buryn osy aýyldaǵy bes balaly Altynbaevtar otbasyna birden 3 sábı qosyldy. Qyzylorda qalasyndaǵy Ana men bala ortalyǵynda dúnıe esigin ashqan úshemder – Aıǵanym, Aıǵanat, Asylym qazir aman-esen ósip keledi.
Jalpy, osy ýaqytqa deıin elimizde bul qubylystyń syryna boılaǵan eshkim joq. Álemdik zertteýshiler dereginshe, egizder sanynan Eýropa qurlyǵy kósh bastasa, Qazaqstan 48-orynda turǵan kórinedi. Jer betine syımaı jatqan Qytaıyńyz sońǵy orynda tur.
Bizdiń bilýimizshe, Qyzylordadan bólek Aqtóbe oblysyndaǵy Altaı batyr, Qostanaıdaǵy Tágil eldi mekenderi egizderimen erekshelenedi. Degenmen de bul taraptaǵy naqty kórsetkishteri bar málimetter joqtyń qasy.
Qyzylorda