Bıyl Almaty oblysy «Aýyl amanaty» jobasy aıasynda 380-nen asa shaǵyn nesıe berip, aýyl azamattarynyń isterin ilgeriletip otyr. «Amanat» partııasy Almaty oblystyq fılıalynyń tóraǵasy Qýat Baıǵojaevtyń málimdeýinshe, joba aıasynda bas-aıaǵy 1337 ótinim kelip túsken.
«Onyń jalpy somasy 9,4 mlrd teńgeni quraıdy. Búginde 381 adam 2,7 mlrd teńge somasynda shaǵyn nesıe aldy. Eń kóp ótinim Eńbekshiqazaq, Uıǵyr, Balqash aýdandarynyń turǵyndarynan kelip tústi», deıdi Q.Baıǵojaev.
Olardyń basym bóligi mal sharýashylyǵymen aınalysady. Jalpaq jurttyń jaǵdaıyn kóterýge baǵyttalǵan jobaǵa qatysýǵa tilek bildirgender az bolmaǵan. Solardyń qatarynda óz kásibin ashpaqqa nıet bildirgen Eńbekshiqazaq aýdanynyń turǵyny Bilál Ahmetov te bar.
«Metall prokatyn uıymdastyrý boıynsha bıznes-jospardy qorǵap, 2,5 paıyzben shaǵyn nesıe aldym. Kerek jabdyqtardy satyp alyp, óz úıimniń aýlasynda shıfer shaǵyratyn seh saldym. О́ndiris tehnologııasy óte qarapaıym, jelige metall paraqty salady da, ol mehanızm arqyly ótedi. Shyǵý kezinde daıyn metall shıfer alynady. Qazir men jaqyn mańdaǵy 8 aýyldy metall shıfermen qamtamasyz etýdi bastap kettik», deıdi otandyq ónim óndirýshi Bilál Ahmetov.
Qurylys qarqyn alǵan ýaqytta istiń kózin tapqan kásipkerdiń bul ónimi aýdandaǵy 8 aýyldyń turǵyny úshin qoljetimdilikti arttyryp, suranysty eselep keledi. Endigi jerde qurylys bastaǵan azamattar úıleriniń nemese saraılary men mal qoralaryn qaptaý úshin shatyr izdep alysqa sabylmaıdy.
«Buryn adamdar qytaı taýarlaryn satyp alatyn. Aýdanda básekege laıyq otandyq taýar paıda boldy. Sapasy jaǵynan basqa shıferlardan kem túspeıdi, biraq baǵasy eki ese arzan. Importtalǵan taýardyń metri 4 myń teńge, al bizdiki bar bolǵany 2 myń teńgeden saýdalanýda. Sapasy men baǵasy kóńilinen shyqqandyqtan, ónimimiz tez ótip jatyr», deıdi ol.
Sóz sońynda eske salar jaıt, azamattardan túsken ótinimderdegi jalpy qarajat somasynyń oblysqa berilgen qarajattan asyp ketýine baılanysty «Aýyl amanaty» baǵdarlamasy boıynsha ótinimderdi qabyldaý toqtatylǵan.
Almaty oblysy