Rıdderdegi Harıýzovka ózeniniń arnasynda muz qatýy saldarynan sý deńgeıi kóterilip, jaqyn mańdaǵy Kırov kóshesi, О́skemen, Harıýzovskıı burylysyndaǵy jeke sektordyń tórt aýlasy men Kırov kóshesindegi eki jer úıdi sý basyp qaldy. Aımaqtyq Tótenshe jaǵdaı departamentiniń qyzmetkerleri qaýiptiń aldyn alý úshin basqa turǵyndardy evakýasııalaýdy usynǵan. Alaıda turǵyndar evakýasııalaýdan bas tartqan. Bul týraly ShQO ákimdigi habarlady, dep jazady Egemen.kz.
«Rıdder qalasy TJB qyzmetkerleri jáne jergilikti atqarýshy organdar halyqty habardar etip, yqtımal evakýasııa jaǵdaıynda jeke quram men quraldardy daıyndyqqa keltirdi. Halyqty ýaqytsha ornalastyrý úshin qala ákimdigi «Rıdder kolledji» KMM ǵımaratynda ornalastyrý pýnktin aldyn ala daıyndady. Halyq evakýasııadan bas tartty», delingen habarlamada.
Sý basqan aýlalardy tazartý jumystaryna TJD qutqarýshylary jumyldyrylǵan. Olar aımaqty muzdan tazartý jáne ózen arnasyna qaraı eńis jasaý úshin arnaıy tehnıka qoldanǵan.
«Keltirilgen zalaldy baǵalaý úshin múddeli memlekettik organdar men uıymdar arasynan komıssııa quryldy. TJ saldaryn joıýǵa barlyǵy 20 adam, jeti tehnıka jáne eki motopompa jumyldyryldy. «LK GES» JShS qyzmetkerleri sý aǵyzýdy azaıtty. Monıtorıng júrgizilip jatyr. Tańǵy saǵat 7.30-daǵy jaǵdaı boıynsha aýla aýmaqtarynan sý tazartyldy, tek jertólelerde qaldy. Oqıǵa ornyna ShQO ákimi Ermek Kósherbaev jáne oblystyq TJD basshylyǵy bardy», delingen ShQO ákimdigi taratqan habarlamada.